ކުރީގެ ދެލޯބިވެރިން އަދި ބޮލީވުޑްގެ މަޝްހޫރު ދެތަރިން ކަމަށްވާ ދީޕިކާ ޕަދުކޯންއާއި ރަންބީރު ކަޕޫރު ޝޯއަކުން އެކީގައި ފެނިގެންދާނެ ކަމަށް ކުރިންވެސް ވަނީ އިއުލާންކޮށްފައެވެ.
ކުރިން މި ޝޯ ގެނެސްދިނުމަށް ނިންމާފައި އޮތީ މި މަހު ނުވައެއް ގަ އެވެ. އެހެން ނަމަވެސް ދީޕިކާގެ ކަނދުރާއަށް ތަދެއްއަރައިގެން އަދި ރަންބީރު ޓައިފޯޑަށް ބޭސްކުރަމުން ދާތީ އެދުވަހު އެ ޝޯ ވަނީ އެދެމީހުންގެ ބަލި ރަނގަޅުވަންދެން ފަސްކޮށްފައެވެ. އެ ފެޝަން ޝޯ ފަސްކޮށްފައި ވަނީ ބަލިހާލަތު ހުރިގޮތުން ޝޯއަށް ނޭރޭ ނެކަމަށް އެދެތަރިން ބުނުމުންނެވެ.
އަނެއްކާވެސް އެ ޝޯ މިވަނީ މިމަހުގެ 19ވާ ބުރާސްފަތި ދުވަހަށް ރީޝެޑިއުލް ކޮށްފައެވެ.
މިޝޯއަކީ އިންޑިއާގެ ޗެރިޓީ ފަންޑްރައިޒާރެއް ކަމަށްވާ ޝަބާނާ އަޒްމީގެ އެންޖީއޯއިން ކޮންމެ އަހަރަކުވެސް ބާއްވާ ޗެރިޓީ ޝޯއެކެވެ. މިޝޯގައި ދީޕިކާއާއި ރަންބީރު އެކުގައި ފެނިގެންދާނީ އިންޑިއާގެ މަޝްހޫރު ފެޝަން ޑިޒައިނަރެއް ކަމަށްވާ މަނިޝް މަލޯތުރާގެ ފެޝަން ޑިޒައިންތަކުންނެވެ. ޝަބާނާ އަޒްމީގެ އެންޖީއޯއަކީ އަންހެނުންގެ ހައްގުތަކަށް މަސައްކަތް ކުރާ ޖަމިއްޔާއެކެވެ. މިޖަމިއްޔާއިން ކޮންމެ އަހަރަކު ވެސް ބާއްވާ މި ފެޝަންޝޯއަކީ ފަންޑްރައިޒިން ފެޝަން ޝޯއެކެވެ.
ރަންބީރާއި ދީޕިކާގެ މީޑީއާ ތަރުޖަމާނުން ވަނީ އެ ފެޝަން ޝޯގައި އެދެމީހުން ފެނިގެންދާނެކަން ކަށަވަރު ކޮށްދީފައެވެ. ދީޕިކާ އާއި ރަންބީރު ރުޅިވިފަހުން ދެމީހުން އެކުގައި ފިލްމު ކުޅުމާއިއިވެންޓުތަކަށް ދިއުން ވަނީ ހުއްޓާލާފައެވެ. އެހެންނަމަވެސް މިދިޔަ ހަފްތާގައި ޑައިރެކްޓަރ ކަރަން ޖޯހަރުގެ ގޭގައި ބޭއްވި ޕާޓީއެއްގައި މި ދެތަރިން އެކީގައި ނަށާފައިވާ ވީޑިއޯއެއް ވަނީ އާންމުކޮށްފައެވެ.
މިޝޯއާއި ބެހޭގޮތުން ދީޕިކާ ބުނެފައިވަނީ މިޝޯގައި އޭނާ ބައިވެރިވަނީ މުޖުތަމައުއަށް ފައިދާހުރި ކަންތައްތަކެއް ކޮށްދިނުމުގެ މަގްސަދުގައި ކަމަށެވެ. އަދި ރަންބީރުވެސް ވަނީ މިޝޯއާއި ބެހޭގޮތުން ވާހަކަ ދައްކާފައެވެ. އޭނާ ބުނީ އަންހެނުންނާއި ފިރިހެނުންނަށް ހަމަހަމަ ފުރުސަތުތަކެއް ހޯދައިދިނުމަށް ބޭނުންވާ ކަމަށާއި އެކަން ދައްކަން ޖެހޭ ކަމަށެވެ. އަދި އަންހެނުންނާއި ފިރިހެނުންނަށް ހަމަހަމަ ފުރުސަތުތައް ލިބެން ބޭނުންވާ ކަމަށް ރަނބީރު ވަނީ ބުނެފައެވެ.
