ސުޕްރީމް ކޯޓުގެ ފަނޑިޔާރު އަލީ ހަދީމާއި ގުޅުންހުރި ގެއަކުން 38 މިލިއަން ރުފިޔާ ހޯދިފައިވާ ކަމަށް ފުލުހުން ބުނެފިއެވެ.

އާދީއްތަ ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ފުލުހުންގެ ތަރުޖަމާން އަހުމަދު ޝިފާން ވިދާޅުވީ ފެބްރުއަރީ ހަވަނަ ދުވަހުގެ ރޭ ފަނޑިޔާރު އަލީ ހަމީދާ ގުޅުން ހުރި ގެއަކުން، 38 މިލިއަން ރުފިޔާއަށްވާ ޔޫއެސް ޑޮލަރާއި ޕައުންޑް ފެނިފައިވާ ކަމަށެވެ. އެހެންނަމަވެސް ފުލުހުން އެއީ ކޮންގެޔެއްކަން ހާމަކޮށްފައެއް ނުވެއެވެ.

ފުލުހުންގެ ވަނީ ނޫސްވެރިންގެ ބައްދަލުވުމުގައި ފަނޑިޔާރު އަލީ ހަމީދުގެ ގާތް ގުޅުމެއް އޮންނަ ގެއިން ފެނުނު ކަމަށް ބުނާ ހެކި ( އެގެއިން ފެނުނު ތަކެތީގެ ) ފޮޓޯ ދައްކާލާފައެވެ.

އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ މައްޗަށް ދައުލަތުން ތިން ދައުވާއެއް ވަނީ އުފުލާފައެވެ. މި ދެ ބޭފުޅުންގެ މައްޗަށް ދެން އުފުލާފައި ވަނީ ޓެރެރިޒަމްގެ ދައުވާ އެވެ. މިދިޔަ ފެބްރުއަރީ މަހުގެ ފުރަތަމަ ދުވަހު ސުޕްރީމް ކޯޓުން ނެރުނު އަމުރަކާ ގުޅިގެން، 5 ފެބްރުއަރީގައި ރައީސް އަބްދުﷲ ޔާމީން ވަނީ ކުއްލި ނުރައްކަލުގެ ހާލަތު އިއުލާން ކުރައްވާފައެވެ. އަދި ހަމަ އެ ރޭ ފުލުހުންނާއި ސިފައިން ވަނީ ކުރީގެ ރައީސް މައުމޫނާއި އުއްތަމަ ފަނޑިޔާރާއި ފަނޑިޔާރު އަލީ ހަމީދު ހައްޔަރުކޮށްފައެވެ. އުއްތަމަ ފަނޑިޔާރު ސައީދާއި ފަނޑިޔާރު އަލީ ހަމީދު ހައްޔަރު ކޮށްފައި ވަނީ ސިފައިންނާއި ފުލުހުން ސުޕްރީމް ކޯޓަށް ގަދަކަމުން ވަދެ، އެ ދެ ބޭފުޅުން އެ ކޯޓުގައި ތިއްބަވަނިކޮށެވެ.