ދުނިޔޭގެ އެންމެ ރީތި އަންހެނަކަށް މިފަހަރު ހޮވުނީ އިންޑިއާގެ މަނޫޝީ ޗިއްލާއެވެ.

ސަތާރަ  އަހަރު ފަހުން އިންޑިއާގެ މީހަކަށް ފުރަތަމަ ލިބުނު މި އެވޯޑާއިއެކު އިންޑިއާއަށް ގޮސް ދީފައިވާ އިންޓަވިއުގައި އޭނާ ވަނީ ފިލްމު ކުޅެން ޝައުގުވެރިކަން ހުރި ކަމަށް ބުނެފައެވެ. އޭނާ މިފަހަރު ފެނުނީ އިސްތިހާރަކުންނެވެ .އިންޑިއާގެ ހަރިޔާނާއަށް ނިސްބަތްވާ މަނޫޝީ  ރީތީގެ މުބާރާތަށް ފަހު ފުރަތަމަ ފަހަރަށް ބޮލީވުޑްގެ ކުޅަދާނަ ބަތަލާ ކަރީނާ ކަޕޫރު ހާނާއި އެކު ވަނީ ފެނިލައިފައެވެ.

ފުޅާ ދާއިރާއެއްގައި އިންޑިއާގައި ގަހަނާ އުފައްދާ ވިއްކާ ކުންފުންޏެއް ކަމަށްވާ މަލަބާރު ގޯލްޑް އެންޑް ޑައިމަންޑުގެ އިސްތިހާރަކުން ކަރީނާ އާއިއެކީ މަނޫޝީ ފެނިގެންދާއިރު އެދެމީހުން ވެސް ފެނިގެންދަނީ ކައިވެނީގެ ހަފްލާއެއްގެ ތެރެއިންނެވެ.

މި އިސްތިހާރުން ކަރީނާ މަނޫޝީ ކައިރިން އޭނާގެ ކައިވެނީގެ ހަފްލާ ބާއްވާނީ ކިހިނެތްކަން އަހައެވެ. ކަރީނާ އެހުމުން މަނޫޝީ އޭނާގެ ކައިވެނީގެ ހަފުލާ އޮންނާނެ ގޮތް  ކިޔައިދެއެވެ. މަނޫޝީގެ ކައިވެނީގެ "ޕްލޭން" ކިޔައި ދިނުމުން ކަރީނާ ވެސް އަލުން ކައިވެނި ކުރާ ހިތްވެއެވެ. އެހެން ނަމަވެސް މަނޫޝީ ކަރީނާ އުޅެނީ ކައިވެނި ކޮށްގެންކަން ހަނދާން ކޮށްދެއެވެ.

މިވީޑިއޯގައި ކަރީނާއާއި މަނޫޝީގެ ފެނިލުމަށް ދަނީ ތަރުހީބު ލިބެމުންނެވެ.

މި އިސްތިހާރު ނެރުމުގެ ކުރިން މަނޫޝީ ދީފައިވާ އިންޓަވިއުއެއްގައި ބުނެފައި ވަނީ ކަރީނާ އާއިއެކީ އެކްޓު ކުރަން ލިބުމުން ޖެހިލުން ނުވާކަމަށެވެ. އޭނާ މިހެން ބުނީ ކަރީނާއާއި އެކީ އެކްޓުކުރަން ލިބުމުން އޭނާ ބިރުގަންނަތޯ ނޫސްވެރިއަކު ސުވާލު ކުރުމުންނެވެ.  އޭނާ ދިރިއުޅެނީ ހިތްއެދޭ ކަންތައްތަކާއިގެން ކަމަށާއި އެހިތް އެދޭ ކަންތައްތަކުގެ ތެރެއިން އެކަމެއް ހާސިލުވުން އެއީ އޭނާ ޖެހިލުންވެ ބިރުގަންނަން ޖެހޭކަމެއް ނޫން ކަމަށެވެ.

ކިޔެވުމާއިގެން ކުރިއަށް ދިއުމަށް ބޭނުންވާ 21 އަހަރުގެ މަނޫޝީ ދަނީ މެޑިކަލް ދާއިރާއިން ތައުލީމު ހާސިލު ކުރަމުންނެވެ.

މަނޫޝީ ވެގެން ދިޔައީ މިސްވޯލްޑްގެ އެވޯޑް ލިބުނު އިންޑިއާގެ 6 ވަނަ އަންހެން މީހާއަށެވެ. އިންޑިއާގެ މީހަކަށް މިސް ވޯލްޑްކަން މަނޫޝީއަށް ވުރެ ކުރިން  ލިބުނީ 2000 ވަނަ އަހަރު ޕްރިޔަންކާ ޗޮޕްރާއަށެވެ.