ބޮލީވުޑްގެ މަޝްހޫރު އެކްޓަރ ސައިފް އަލީ ޚާންގެ އަންހެނުން އަދި މަޝޫހޫރު ބޮލީވުޑް އެކްޓްރެސް ކަރީނާ ކަޕޫރު ޚާން މިހާރު އެންމެ ބޭނުންވަނީ ސައިފްގެ މުހިންމު ރޯލެއް ފެނިގެންދާ "ރަންގޫން" ބަލަންކަމަށް އޭނާ ބުނެފިއެވެ.
ކަރީނާ ބުނީ މިވަގުތު އޭނާ އެންމެ އިންތިޒާރު ކުރަމުންދަނީ އެފިލްމު ޕްރިމިއާ ކުރާނެ ދުވަހަކަށް ކަމަށާއި ސަބަބަކީ އޭނާގެ ފިރިމީހާ މި ފިލްމުގައި އަދާ ކުރާ ރޯލް ބެލުމަށް ބޭނުންވާތީ ކަމަށެވެ.
މި ފިލްމް ކުޅުމަށްޓަކައި ސައިފް އޭނާގެ މަތިމަސް ދިގުކޮށްފައި ހުރި އިރު، ސައިފް މި ރޯލުގައި ހަރަކާތްތެރިވެފައިވާ ގޮތް ބެލުމަށް ވަރަށް ބޭނުންވާ ކަމަށް ކަރީނާ ވަނީ ބުނެފައެވެ.
އަދި ފިލްމުގައި ސައިފްގެ ލޯބިވެރިޔާ ހިމާޔަތްކުރަން ކުރާ މަސައްކަތް ބަލާލަން ވެސް ބޭނުންވާ ކަމަށް ކަރީނާ ވަނީ ބުނެފައެވެ.
ތިނެސްކަން ލޯބީގެ ވާހަކައަކަށް އުފައްދާފައިވާ މި ފިލްމު ރިލީޒްކުރުމަށް ހަމަޖެހިފައިވަނީ ފެބްރުއަރީ މަހުގެ 24 ވަނަ ދުވަހުއެވެ.
ދުނިޔޭގެ ދެވަނަ ބޮޑު ހަނގުރާމައިގެ ދުވަސްވަރު ހިނގާދިޔަ ކަންތައްތަކެއް ދައްކުވައިދޭ މި ފިލްމްގައި ލީޑް ރޯލުން ޝާހިދް ކަޕޫރާއި ސައިފް އަލީ ޚާންގެ އިތުރުން ކަންގަނާ ރަނައުޓް ފެނިގެންދާއިރު، މި ފިލްމުގެ ޓްރެއިލަރ ރިލީޒްކުރުމާ އެކު ލިބުނު ބޮޑު ތަރުޙީބާ ގުޅިގެން ފިލްމުގެ ޓީމުން ވަނީ އެކަން ފާހަގަކޮށްފައެވެ.
