މިޔަންމާގައި ހައްޔަރުކޮށްފައިވާ ނޫސްވެރިން ވަގުތުން ވަގުތަށް މިނިވަންކުރުމަށް އދ. އާއި އިނގިރޭސި ވިލާތުން ގޮވާލައިފިއެވެ.

ރޮއިޓާސްގައި މަސައްކަތްކުރާ ވާ ލޯން އާއި ކިޔާވް ސޯއީ އޯ ޑިސެމްބަރު މަހުގެ ތެރޭގައި ހައްޔަރުކޮށްފައި ވަނީ ޑިސެމްބަރު މަހުގެ ތެރޭގައެވެ. އެ މީހުންގެ މައްޗަށް މިޔަންމާ ސަރުކާރުން ކޮށްފައި ވަނީ ސަރުކާރުގެ ސިއްރު ލިޔެކިޔުންތައް ވަގަށް ނެގިކަމުގެ ތުހުމަތެވެ. މި ދައުވާ ސާބިތުވެއްޖެ ނަމަ އެ މީހުންގެ މައްޗަށް 14 އަހަރުގެ ޖަލު ހުކުމެއް އަންނާނެއެވެ. އެ މީހުންގެ ބަންދާ ގުޅޭ ގޮތުން ބުދަ ދުވަހު އަޑުއެހުމެއް ބާއްވާފައިވާ އިރު އެ ދެ މީހުން މިނިވަންކުރުމަށް ހުށަހެޅި ހުށަހެޅުން ފަނޑިޔާރު ވަނީ ހެކި ނެތް ކަމަށް ބުނެ ބަލައިގަތުމަށް ދެކޮޅު ހަދާފައެވެ.

އިނގިރޭސި ޚާރިޖީ ވަޒީރު ބޮރިސް ޖޯންސަން ކުރެއްވި ޓްވީޓެއްގައި ވިދާޅުވީ ހިޔާލުފާޅުކުރުމުގެ މިނިވަންކަން ދިނުމުގައި މިޔަންމާގެ އިހްލާސްތެރިކަން ދައްކަންޖެހޭ ކަމަށެވެ. އދ. ހާއްސަ ރެޕަޓުއާގެ ފަރާތުން ނެރުނު ބަޔާނެއްގައި ވަނީ އެ ދެ ރިޕޯޓަރުން ހައްޔަރުކުރުމަކީ އިންވެސްޓިގޭޓިވް ޖަރނަލިޒަމްއަށް ކުރިމަތިކުރެވޭ ވަރަށް ބޮޑު ހުރަހެއް ކަމަށާއި އެކަމާ މެދެ ކަންބޮޑުވާ ކަމަށެވެ.

އެ ދެ މީހުން ހައްޔަރުކޮށްފައި ވަނީ މިޔަންމާ ސިފައިން ރޮހިންޖާ މުސްލިމުންނާ ދެކޮޅަށް ހިންގި ޖަރީމާތަކާ ގުޅޭ ޚަބަރުތައް ކަވަރުކުރުމުގެ ތެރޭގައެވެ. އެ ދެ ނޫސްވެރިން ރިޕޯޓްކުރި މައްސަލަތަކާ ގުޅިގެން މިޔަންމާގެ ކޯޓުން ވަނީ އަންގާރަ ދުވަހު ރޮހިންޖާ މުސްލިމުންގެ 10 މީހަކު މަރާލުމުގައި ބައިވެރިވުމުގެ ކުށުގައި އަސްކަރިއްޔާގެ ހަތް މީހެއްގެ މައްޗަށް 10 އަހަރުގެ ހުކުމެއް އިއްވާފައެވެ. 

މެކްރޯން އާއި ރެޕަޓުއާގެ ބަޔާނުގައި ވިދާޅުވެފައި ވަނީ އެ ދެ ނޫސްވެރިން ހާމަކޮށްދިން މައުލޫމާތުގެ ތެދުކަން އަންގާރަ ދުވަހުގެ ހުކުމުން ވެސް ސާބިތުވާ ކަމަށާއި ނަމަވެސް 14 އަހަރު ދުވަހަށް އެ ދެ މީހުން ޖަލަށް ލުމަށް މަސައްކަތްކުރުމަކީ ހަމަޖެހޭ ކަމެއް ނޫން ކަމަށެވެ. އަދި އެ ދެ މީހުން ހައްޔަރުކޮށްފައި ވަނީ ޣައިރުގާނޫނީ ގޮތެއްގައި ކަން އެ ހުކުމުން ސާބިތުވާ ކަމަށާއި އެހެން ކަމުން އެ ދެ މީހުން ވަގުތުން ވަގުތަށް މިނިވަންކުރުމަށް ވަނީ ގޮވާލައްވާފައެވެ.