އަލްޖީރިއާގައި މަތިންދާބޯޓެއް ވެއްޓި 100 މީހުން މަރުވެއްޖެ
11 އެޕްރީލު 2018 | ބުދަ 11:38މި ބޯޓުގައި ދަތުރުކޮށްފައި ވަނީ އަސްކަރިއްޔާގެ އޮފިސަރުން
އަލްޖީރިއާގައި ފްލައިޓް ވެއްޓުނު ސަރަހައްދު
އަލްޖީރިއާގައި އަސްކަރީ މަތިންދާބޯޓެއް ވެއްޓި 100 އަށް ވުރެ ގިނަ މީހުން މަރުވެއްޖެއެވެ.
އެ ގައުމުގެ މީޑީއާތަކުން ރިޕޯޓުކޮށްފައިވާ ގޮތުގައި ބޯޓު ވެއްޓިފައި ވަނީ ވެރިކަންކުރާ އަލްޖަޔާސްގެ ރަށް ބޭރުން އޮންނަ ބޯފަރިކް އެއާބޭސް ކައިރިއަށެވެ. މި ބޯޓުގައި ދަތުރުކޮށްފައި ވަނީ އަސްކަރިއްޔާގެ އޮފިސަރުން ކަމަށާއި އަދި އޭގެ ތެރެއިން 100 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓުތައް ބުނެއެވެ. ބޯޓުގައި ތިބީ ކިތައް މީހުން ކަމެއް އެއްވެސް މީޑިއާއަކަށް ޔަގީންކޮށްދެވިފައެއް ނުވެއެވެ. މި ބޯޓު ދަތުރުކުރަމުން ދިޔައީ ހުޅަނގު އަލްޖީރިއާގެ ސިޓީއެއް ކަމަށްވާ ބެޗާރްއަށެވެ. ވެއްޓުނު ބޯޓަކީ ރަޝިއާގައި އުފައްދާ އިލޫޝިން މަރުކާގެ ބޯޓެކެވެ.
ރިޕޯޓުތައް ބުނާ ގޮތުން ބޯޓު ވެއްޓުނު ސަރަހައްދުގައި 14 ވަރަކަށް އެމްބިއުލާންސް ހަރަކާތްތެރިވެފައިވެއެވެ. އާންމުވެފައިވާ ވީޑިއޯތަކުން ފެންނަ ގޮތުގައި ވެއްޓިފައިވާ ބޯޓުގައި އަލިފާން ރޯވެ ދުން އަރަމުންދެއެވެ. އެ ގައުމުގެ ޑިފެންސް މިނިސްޓްރީ އިން ނެރެފައިވާ ބަޔާނެއްގައި ވަނީ މި ހާދިސާ ތަހުގީގުކުރަމުންދާ ކަމަށާއި އަދި އަސްކަރިއްޔާގެ އެންމެ އިސްވެރިޔާ އެ ސަރަހައްދަށް ވަޑައިގަންނަވާނެ ކަމަށެވެ.
މީގެ ހަތަރު އަހަރު ކުރިން ވެސް އަލްޖީރިއާގައި ވަނީ އަސްކަރިއްޔާގެ އޮފިސަރުން ގޮވައިގެން ދަތުރުކުރި މަތިންދާބޯޓެއް ވެއްޓި 77 މީހުން މަރުވެފައެވެ.
