ޖާބިރަށް އިނގިރޭސި ވިލާތުން ސިޔާސީ ހިމާޔަތްދީފި
މިދިޔަ އަހަރުގެ ޖޫން މަހުން ފެށިގެން ޖާބިރު ހުންނެވީ އިނގިރޭސިވިލާތުގައި
ރައްޔިތުންގެ މަޖިލީހުގެ ކުރީގެ މެމްބަރު އަބްދުﷲ ޖާބިރު
ކުރީގެ ރައީސް މުހައްމަދު ނަޝީދުގެ ޕޮލިޓިކަލް އެޑްވައިޒަރު އަދި ރައްޔިތުންގެ މަޖިލީހުގެ ކުރީގެ މެމްބަރު އަބްދުﷲ ޖާބިރަށް އިނގިރޭސިވިލާތުން ސިޔާސީ ހިމާޔަތްދީފިއެވެ.
ޖާބިރަށް، އިނގެރޭސި ސަރުކާރުން ސިޔާސީ ހިމާޔަތްދީފައިވާކަން ހާމަކޮށް، އަނބިކަނބަލުން އަދި ކުރީގެ ބަންޑާރަ ނައިބު ދިޔާނާ ސައީދު ވަނީ ޓްވީޓްކުރައްވާފައެވެ. ޖާބިރަށް ސިޔާސީ ހިމާޔަތް ލިބުނުކަން ހާމަކޮށް ދިޔާނާ ކުރެއްވި ޓުވީޓްގައި ވަނީ ކުރީގެ ރައީސް މުހައްމަދު ނަޝީދު ކޮށްދެއްވި މަސައްކަތަށް ޝުކުރު އަދާކުރައްވާފައެވެ.
ޖާބިރަށް އިނގެރޭސި ސަރުކާރުން ސިޔާސީ ހިމާޔަތްދިން އިރު، ޖާބިރު އިނގިރޭސިވިލާތުގައި ހުންނަވާތާ ދުވަސްތަކެއް ވަނީ ވެފައެވެ. އެގޮތުން ލަންޑަނަށް ވަޑައިގެންނެވި ދަތުރު މަތީގައި އުޅުއްވަނިކޮށް ސަރުކާރުން ވަނީ ޖާބިރުގެ ޕާސްޕޯޓް ވެސް ކެންސަލް ކޮށްފައެވެ. އެއާ އެކު ގަޑިއިރުތަކެއްގައި ޖާބިރަށް އެއާޕޯޓުގައި މަޑުކުރައްވަން ޖެހިވަޑައިގަތެވެ.
ޖާބިރަށް އިނގިރޭސި ސަރުކާރުން ސިޔާސީ ހިމާޔަތް ދިންއިރު، ފުލުހުން އަންނަނީ ބަލަމުންދާ މައްސަލައަކާ ގުޅިގެން ކަމަށް ބުނެ ޖާބިރު ހޯދުމަށް މަސައްކަތްކުރަމުންނެވެ.
