ނިވައިރޯޅީގައި ހިމެނޭ ތަރިން އިއުލާންކުރުން މިރޭ!

ރާއްޖޭގެ ފިލްމީ ދާއިރާގެ މަޝްހޫރު ތަރި ނިއުމާ މުހައްމަދުގެ އެންމެ ފަހުގެ ފިލްމު "ނިވައިރޯޅީ" ގައި ހިމެނޭ ތަރިން އިއުލާން ކުރުން މިރޭ އޮންނާނެއެވެ.

މިރޭ ރާނބާ ރެސްޓޯރެންޓުގައި އޮންނަ ހަފްލާގައި މި ފިލްމުގައި ހިމެނޭ ތަރިން އިއުލާން ކުރާއިރު މި ފިލްމަކީ ނިއުމާގެ ވަދާއީ ފިލްމެވެ.

ފިލްމީ ދާއިރާއިން ރިޓަޔާކުރަން ނިއުމާ ނިންމާފައި ވަނީ އޭނާގެ 40 ވަނަ އުފަންދުވަހުއެވެ. ހަމަ އެރޭގައި އޭނާ ވަނީ "ނިވައިރޯޅި" އަކީ އޭނާގެ އެންމެ ފަހު ފިލްމު ކަމަށް ބުނެ ފިލްމުގެ ޓީޒާ ލޯންޗު ކޮށްފައެވެ.

މި ފިލްމު ޑައިރެކްޓު ކުރަނީ މުއުމިން ފުއާދުއެވެ. އަދި ޕްރޮޑިއުސް ކުރަނީ ނިއުމާއެވެ.

ރާއްޖޭގެ ބައެއް މީޑިއާތަކަށް ދީފައިވާ އިންޓަވިއުތަކުގައި މި ފިލްމާ ބެހޭ ގޮތުން ނިއުމާ ބުނެފައިވަނީ މި ފިލްމުން އޭނާއާ އެކު އާ ތަރިންތަކެއް ފެންނާނެ ކަމަށެވެ. އަދި ފިލްމުގެ ޝޫޓިންއަށް ތައްޔާރުވުމަށް އޭނާ ފަލަވުމަށް މަސައްކަތް ކުރަމުންދާ ކަމަށް ވަނީ ބުނެފައެވެ. މި ފިލްމު ރިލީޒް ކުރުމަށް ހަމަޖެހިފައި ވަނީ މިއަހަރުގެ އޮކްޓޯބަރު މަހުގެ ތެރޭގައެވެ.

ދިވެހި ފިލްމީ ދާއިރާއިން 1995 ވަނަ އަހަރު ފެނިގެންދިޔަ ނިއުމާ ވަނީ 1000 އަށް ވުރެ ގިނަ ލަވައިގައި ހަރަކާތްތެރިވެފައެވެ. އަދި އޭގެ އިތުރުން އެތަކެއް ޑްރާމާ ސީރީޒްއަކާއި އެތައް ފިލްމެއްގައި ވަނީ ހަރަކާތްތެރި ވެފައެވެ. ނިއުމާ ކުޅެފައިވާ ފިލްމުތަކުގެ ތެރޭގައި 1998 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ފަތިސް ހަނދުވަރު"، 1999 ވަނަ އަހަރު ރިލީޒްކުރި ފަރިވާ ފިލްމްސްގެ "ބަދަލު"، 2002 ވަނަ އަހަރު ނިކުތް ޑައިރެކްޓަރ ފީރޯޒް އައިޝަތު ގެ "ހިތް އެދެނީ"، 2003 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ގިނި ހިލަ"، 2004 ވަނަ އަހަރު ނިކުތް ޑައިރެކްޓަރ ފާތިމަތު ނަހުލާގެ "ކަލާޔާ ނުލާ"، 2005 ވަނަ އަހަރު ނިކުތް ޑައިރެކްޓަރ އަޙުމަދު ނިމާލް ގެ "ދަރިންނަށްޓަކައި"، 2006 ވަނަ އަހަރު ނިކުތް ޑައިރެކްޓަރ އަހުމަދު ނިމާލް ގެ "ހިޔަނި"، އަދި 2008 ވަނަ އަހަރު ނިކުތް ޑައިރެކްޓަރ ފާތިމަތު ނަޙުލާގެ "ޔޫސުފް" ފަދަ ފިލްމްތައް ހިމެނެއެވެ.