މާޗް މަހުގެ 2 ވަނަ ދުވަހު އޮލިމްޕަހުގައި އެޅުވުމަށް ހަމަޖެހިފައިވާ "މަލިކާ" ޕްރިމިއާ ކުރުމުގެ ކުރިން ޚާއްސަ ސްކްރީނިންއެއް ބާއްވަން ނިންމައިފި އެވެ.
މިފިލްމުގެ ޓިކެޓް ފެބްރުއަރީ 5 ވަނަ ދުވަހުން ފެށިގެން ވިއްކަން ފަށާފައިވާއި މިފިލްމަށް ބޮޑު ތަރުހީބެއް ލިބިފައިވާ ކަމަށް ފިލްމްގެ މާކެޓިން ހެޑް ހުސައިން ނޫރައްދީން ބުންޏެވެ.
ރާއްޖެއެމްވީއަށް މައުލޫމާތު ދެމުން ހުސައިން ނޫރައްދީން ބުނީ މާޗް މަހުގެ 2 ގައި ފިލްމް ޕްރިމިއާ ކުރުމުގެ ކުރިން މާޗް 1 ގައި މީޑިއާތަކާއި ދައުވަތު ދެވޭ ފަރާތަކަށް ފިލްމްގެ ޚާއްސަ ސްކްރީނިންއެއް ބާއްވަން ނިންމާފައިވާ ކަމަށެވެ. ފިލްމުގެ ޓިކެޓް ފުރަތަމަ ދޫކޮށްފައި ވަނީ އޮންލައިން ބުކިން ހަދާފައި ތިބި ފަރާތްތަކަށެވެ.
މާރޗް 2 އިން 20 އަށް އޮލިމްޕަހުގައި އެޅުވުމަށް ހަމަޖެހިފައިވާ މި ފިލްމްގެ ޕްރިމިއާ ޝޯގެ ޓިކެޓްގެ އަގަކީ 200ރ. އެވެ. އިތުރު ޝޯތަކުގެ ޓިކެޓް ވިއްކުމަށް ހަމަޖެހިފައިވަނީ 100ރ. އަށެވެ.
އަހުމަދު ނާސިރު ( މައްލާ) އާއި އިބްރާހިމް ރަޝީދު (އިއްބެ) ޕްރޮޑިއުސް ކޮށްފައިވާ މި ފިލްމަކީ ބިންމާ އިބްރާހިމް ވަހީދު ލިޔެފައިވާ އާއިލީ ލޯބީގެ ހަދިސާއެއްގެ މައްޗަށް ބިނާކޮށް ލިޔެފައިވާ ވާހަކައެއްގެ މައްޗަށް ތައްޔަރު ކުރާ ފިލްމެކެވެ.
މި ފިލުމްގައި ހިމެނޭ ތަރިންގެ ތެރޭގައި ފިލްމީ ދާއިރާއަށް އަލަށް ތައާރފްވާ ނުޒުހަތު ޝުއައިބް (ނުޒޫ) އާއި މަރިޔަމް ޝަކީލާ، އިސްމާއިލް ޒާހިރު، އަލީ ފާރޫގް، އަހުމަދު އަސިމް، ފާތިމަތު އާޒިފާ، ޖުމައްޔިލް ނިމާލް، އަލީ އާޒިމް، ސުޖީތާ އަބްދުﷲ އަދި އަހުމަދު ޝާކިރު ހިމެނެއެވެ.
