މިސިސިޕީގެ ފުރަތަމަ އަންހެން ސެނޭޓަރ އާއިއެކު ސެނޭޓްގެ އަންހެން ބޭފުޅުންގެ އަދަދު ރެކޯޑެއް

އެމެރިކާގެ ސެނޭޓްގައި މިސިސިޕީ ތަމްސީލް ކުރެއްވުމަށް ފުރަތަމަ ފަހަރަށް އަންހެން ބޭފުޅަކު ހުވާކުރައްވައި ސެނޭޓްގެ އަންހެން މެމްބަރުންގެ އަދަދު ރެކޯޑް މިންވަރަކަށް އިތުރުވެއްޖެއެވެ.

ރިޕަބްލިކަން ޕާޓީގެ ސިންޑީ ހައިޑް-ސްމިތް ހޯމަ ދުވަހު މަގާމުގެ ހުވާކުރެއްވުމާއިއެކު ސެނޭޓްގައި ތިއްބަވާ އަންހެން މެމްބަރުންގެ އަދަދު 23 އަރައެވެ.

ސިންޑީ ހައިޑް-ސްމިތަށް އެމެރިކާގެ ނައިބް ރައީސް މައިކް ޕެންސް ހުވާލައިދެއްވިއިރު ނައިބްރައީސްގެ ކުރިފުޅު މައްޗަށް އެކަމަނާ ގެންގޮސްދެއްވީ ގްރޭންޑް އޯލްޑް ޕާޓީ(ޖީއޯޕީ)ގައި އެކަމަނާއާއިއެކު މަސައްކަތްކުރެއްވި ރޮޖަރ ވިކަރއެވެ.

ހުވައި ލައިދެއްވުމަށް ފަހު ޕެންސްވަނީ އެކަމަނާއަށް" މަރުހަބާ ސެނޭޓަރ"އޭ ވިދާޅުވެފައެވެ.

އެކަމަނާ ހުވާކުރެއްވުމާއިއެކު ޗެމްބަރުގައި ތިއްބެވި ބޭފުޅުންވަނީ އަތްތިލަބަޑި ޖައްސަވައި ތަރުހީބު ދެއްވާފައެވެ. އަދި ބައެއް މެމްބަރުންވަނީ އެކަމަނާ އަރިހަށް ވަޑައިގެން ސަލާމް ކުރައްވާފައެވެ. އޭގެ ތެރޭގައި ޑެމޮކްރެޓިކް ލީޑަރ ޗަކް ޝޫމާ ހިމެނިވަޑައިގަންނަވައެވެ.

މިސިސިޕީގެ އެގްރިކަލްޗަރ އެންޑް ކޮމާސް ކޮމިޝަނަރގެ މަގާމް އަދާކުރައްވާފައިވާ ހައިޑް-ސްމިތް ސެނޭޓަށް އައްޔަން ކުރައްވާފައި ވަނީ ކުރިން އެ ގޮނޑީގައި އިންނެވި ތޭޑް ކޯކްރަން ސިއްހީ ހާލުކޮޅުގެ ސަބަބުން އޭޕްރީލް މަހުގެ 1 ވަނަ ދުވަހުން ފެށިގެން އިސްތިއުފާ ދެއްވުމުންނެވެ.

ސްޓޭޓްގެ ލެޖެންޑް ކޯކްރަން އެ ގޮނޑި ފުރުއްވަމުން ގެންދެވީ 1978 ން ފެށިގެންނެވެ.

މެގްނޯލިއާ ސްޓޭޓުން ކޮންގްރެސްއަށް ވަޑައިގެންނެވި ފުރަތަމަ އަންހެން ބޭފުޅަކީ ހައިޑް-ސްމިތްކަމަށްވާއިރު މަތީގެ މެމްބަރުކަމަށް މިސިސިޕީއިން ވަޑައިގެންނެވި ފުރަތަމަ އަންހެން ބޭފުޅަކަށް ވެވަޑައިގަތުމަކީ އެކަމަނާއަށް ލިބިވަޑައިގެންނެވި އިތުރު ޝަރަފެކެވެ.