ނާޝިދު މަރުވީ ފިޓް ޖެހިގެން ކަމަށް ޑޮކްޓަރުން ބުނެފި
8 އެޕްރީލު 2018 | އާދީއްތަ 17:13ނާޝިދު މަރުވެފައި އޮއްވާ ފެނުނީ ހޮނިހިރު ދުވަހު
މަރުވި ނާޝިދުގެ ހަށިގަނޑު ގެންދަނީ
ގއ. މާމެންދޫ ފަޅު ތެރޭގައި މަރުވެފައި އޮއްވާ ހޮނިހިރު ދުވަހު ފެނުނު މީހާ މަރުވީ ފިޓް ޖެހިގެން ކަމަށް ޑޮކްޓަރުންނާއި ހަވާލާދީ އާއިލާއިން ބުނެފިއެވެ.
މާމެންދޫ ފަޅު ތެރޭ، އެރަށު ނެރު ބައްތި ކައިރީގައި މަރުވެފައި އޮއްވާ ފެނިފައިވަނީ މާމެންދޫ، މޫންލައިޓްވިލާ އުމުރުން 38 އަހަރުގެ މުހައްމަދު ނާޝިދެވެ.
ބައެއް މީޑިއާތަކަށް ޢާއިލާއިން ބުނި ގޮތުގައި ނާޝިދު މަރުވީ ފިޓް ޖެހިގެން ކަމަށް ޑޮކްޓަރުން ވަނީ ބުނެފައެވެ.
ނާޝިދުގެ ހަށިގަނޑު ފެނިގެން ފުލުހުންނަށް ރިޕޯޓްކުރިއެވެ. އަދި ފުލުހުން އޭނާގެ ހަށިގަނޑު ގެންގޮސްފައިވަނީ ގއ. ވިލިނގިލީ ހޮސްޕިޓަލަށެވެ. ކުރިން މީހަކާ އިނދެ ދަރިން ވެސް ލިބިފައިވާ ނާޝިދަކީ އެރަށުގައި މަސްވެރިކަން ކުރާ މީހެކެވެ.
މާމެންދޫން ވާހަކަ ދެއްކި ބައެއް މީހުން ބުނި ގޮތުގައި ނާޝިދުގެ ހަށިގަނޑު މޫދުން ނެގި އިރު އޮތީ ހަށިގަނޑު ހަރުވެފައެވެ.
މާމެންދޫ ފަޅު ތެރޭގައި މީހަކު މަރުވެފައި އޮއްވާ ފެނުނު މައްސަލަ ތަހުގީގު ކުރަމުންދާ ކަމަށް ފުލުހުން ބުނެއެވެ. މައްސަލަ ތަހުގީގު ކުރަމުންދާތީ އިތުރު ތަފުސީލު ދެވެން ނެތް ކަމަށް ވެސް ފުލުހުން ބުނެއެވެ.
