ޝަލަބީގެ އާ ލަވަ: މަގޭ ޚާއްސަ ދަރިފުޅާ، އެންމެން ރޮއްވާލައިފި
މަގޭ ޚާއްސަ ދަރިފުޅާ ނެރެފައިވަނީ އޯޓިޒަމް ދުވަހުގައި
ޝަލަބީ އިބްރާހިމް
އޯޓިޒަމް ދުވަހާއި ދިމާކޮށް ލަވަކިޔުންތެރިޔާ ޝަލަބީ އިބްރާހިމްގެ އަޑުން ކިޔާފައިވާ "މަގޭ ޚާއްސަ ދަރިފުޅާ" އެންމެން ރޮއްވާލާއިފިއެވެ.
އޯޓިޒަމް ދުވަހުގައި އަމީނިއްޔާ ސްކޫލުގައި ބޭއްވި ޚާއްސަ ރަސްމިއްޔާތުގައި އެޑިއުކޭޝަން މިނިސްޓަރ ޑރ.އައިޝަތު ޝިހާމް ނެރުއްވި މިލަވައަށް އަޑުއެހުންތެރިންގެ ބޮޑު ތަރުހީބެއް ދަނީ ލިބެމުންނެވެ.
މިލަވަ ހަދާފައިވަނީ ނަސްމާ އަބްދުލް މުހުސިންއެވެ. އޭނާގެ ދަރިފުޅަށް ހަދާފައިވާ"މަގޭ ޚާއްސަ ދަރިފުޅާ" އަކީ ހަމަ އެކަނި ޚާއްސަ އެހީއަށް ބޭނުންވާ ކުދިންނަށް ހަދާފައިވާ ލަވައެއް ކަމަށް ޝަލަބީގެ މެނޭޖަރ ޝަފީގް އަލީ 'ސައްޕެ' ބުންޏެވެ.
ސައްޕެ ބުނީ ރޯދައިގެ ކުރިން މި ލަވައިގެ ވީޑިއޯ ނެރޭނެ ކަމަށެވެ.
ހަމަ އެކަނި ލަވަފޮށިން އިވޭ މިލަވަ އަށް ލިބޭ ތަރުހީބަށް ސައްޕެ ވަނީ ޝުކުރު އަދާކޮށްފައެވެ.
މިމަހުގެ 31 ވަނަ ދުވަހުގައި ވެސް ޝަލަބީ ވަނީ އާ ލަވައެއް އޭނާގެ ފޭނުންނަށް ހަދިޔާ ކޮށްފައެވެ. އުފަންދުވަހުގެ ހަދިޔާއެއްގެ ގޮތުގައި ޝަލަބީ ނެރުނު "ހީލާ" އަށްވެސް ވަނީ ގިނަބައެއްގެ ތަރުހީބެއް ލިބިފައެވެ.ހީލާ އަކީ މީގެ 10 ވަރަކަށް އަހަރުކުރީން ނަސްމާ އަބްދުލް މުހުސިން ހަދާފައިވާ އަމިއްލަ ރާގެއްގެ ލަވައެކެވެ. މިލަވަ ވެސް ޕްރޮޑިއުސް ކޮށްފައި ވަނީ "ހައުސް އޮފް މިއުޒިކް"އިންނެވެ.
