ބޮލީވޫޑްގެ މަޝްހޫރު ދެތަރިން ކަމަށްވާ ރަމްބީރު ކަޕޫރާއި ކެޓްރީނާ ކައިފް އެކުގައި ފެނިގެންދާ "ޖައްގާ ޖާސޫސް"ގައި 29 ލަވަ ހިމެނޭ ކަމަށް ރިޕޯޓްތައް ބުނެފިއެވެ.
އަނޫރާގް ބާސޫ ޑައިރެކްޓްކުރާ މި ފިލްމަށް މިއުޒިކް ތައްޔާރުކޮށްދެނީ އޭނާގެ މަޝްހޫރު އުފެއްދުމެއް ކަމަށްވާ "ބަރްފީ"ގެ ރީތި މިއުޒިކް ތައްޔާރުކޮށްދިން މަޝްހޫރު ކޮމްޕޯސަރ ޕްރިތަމް ޗަކްރަބަތީއެވެ. ޕްރިތަމް ގެންދަނީ މި ފިލްމަށް މިއުޒިކް ތައްޔާރުކުރުމުގައި ބުރަ މަސައްކަތްތަކެއް ކުރަމުންނެވެ. ހާއްސަކޮށް ކުރީގެ ދެ ލޯބިވެރިން ކަމަށްވާ ކެޓްރީނާ އާއި ރަމްބީރު ޒަމާންތަކަކަށް ފަހު އެކުގައި ފެނިގަންދާ މި ފިލްމުގައި ދެ މީހުންގެ ކެމިސްޓްރީއާ ގުޅޭ ގޮތަށް މިއުޒިކް ހެދުމަށް އޭނާ ދަނީ މަސައްކަތްކުރަމުންނެވެ.
މީޑިއާއާ ވާހަކަ ދައްކަމުން ޕްރިތަމް ބުނީ މުޅި ފިލްމްގައި ވެސް ރަމްބީރު ވާހަކަ ނުދައްކާ ކަމަށާއި އޭނާ ވާހަކަ ދައްކާ މަންޒަރު ހަމައެކަނި ފެނިގެންދާނީ ލަވަތަކުން ކަމަށެވެ. އެހެންކަމުން ގިނަ ލަވަތަކެއް ފިލްމުގައި ހިމެނިގެން ދިޔުމުން "އޮޑްނުވާނެ" ކަމަށް ވެސް އޭނާ ބުންޏެވެ. ރިޕޯޓްތައް ބުނާ ގޮތުން ފިލްމްގައި ރަމްބީރުގެ އިހްސާސްތައް ބުނެދިނުމަށް ބޭނުންކުރާނީ ލަވަތަކެވެ.
ރަމްބީރާއި ކެޓްރީނާގެ ލޯބީގެ މައްސަލަގަނޑުގެ ތެރޭގައި ތާށިވެ ދިގުލައިގެން ގޮސްފައިވާ "ޖައްގާ ޖާސޫސް" މިހާރު ރިލީޒްކުރުމަށް ހަމަޖައްސާފައި ވަނީ މި އަހަރުގެ އޭޕްރީލް މަހުގެ ތެރޭގައެވެ. މި ފިލްމްގެ މަސައްކަތް ނިމިފައިވާތާ ވެސް ގިނަ ދުވަސްތަކެއް ވެއްޖެއެވެ. ނަމަވެސް ފިނިޝިންގެ މަސައްކަތް ނުނިމި ލަސްވެގެން ދިޔައީ ތަފާތު އެކި ސަބަބުތަކާ ހުރެއެވެ. މައްސަލަތައް ހައްލުކޮށް ދެ ތަރިން ވެސް މިހާރު ވަނީ ފިލްމް ރިލީޒްކުރުމަށް އެއްބާރުލުން ދޭން ނިންމައި މަސައްކަތް ފަށާފައެވެ.
