އިސްރާއީލް ސިފައިން ޓޭންކަރަކުން ޙަމަލާދީ ފަލަސްތީނުގެ ދަނޑުވެރިޔަކު މަރާލައިފި
30 މާރިޗު 2018 | ހުކުރު 08:336 ހަފްތާގެ މުއްދަތަކަށް މުޒާހަރާތައް ކުރިއަށްދާނެ
އިސްރާއީލް - ޣައްޒާ ބޯޑަރު ކައިރީގައި މިހާރު ވެސް ހަމަނުޖެހުން ބޮޑު
ހުކުރު ދުވަހުން ފެށިގެން ދިގުދެމިގެންވާ މުޒާހަރާތަކަކަށް ފަލަސްތީނުގެ ރައްޔިތުން ތައްޔާރުވަމުންދަނިކޮށް، އިސްރާއީލް ސިފައިން ޓޭންކަރަކުން ޙަމަލާދީ ފަލަސްތީނުގެ ދަނޑުވެރިޔަކު މަރާލައިފިއެވެ.
މިޙަމަލާދީފައި ވަނީ ދެކުނު ޣައްޒާގެ ޚާން ޔޫނިސްގައެވެ. މިޙަމަލާގައި އިތުރު މީހަކަށް ސީރިއަސް ޒަޚަމްތަކެއް ލިބި، ހޮސްޕިޓަލުގައި ދަނީ ފަރުވާދެމުންނެވެ.
އިސްރާއީލް ސިފައިން ބުނާ ގޮތުގައި އެޤައުމުގެ ސިފައިން ޙަމަލާދިނީ ސަރަހައްދީ އިމާއި ކައިރީގައި ތިބި މުޖާހިދުން ކަމަށް ޝައްކުކުރެވޭ ބަޔަކަށެވެ. އެހެން ނަމަވެސް ޙަމާސް ޖަމާޢަތުން ބުނާ ގޮތުގައި އިސްރާއީލުގެ ބޭނުމަކަށްވީ 6 ހަފްތާގެ މުއްދަތަކަށް ކުރިއަށްދާ މުޒާހަރާތަކާ ދިމާކޮށް ފަލަސްތީނުގެ ރައްޔިތުން ބިރު ގެންނެވުމެވެ. އިސްރާއީލުގެ ޚާރިޖިއްޔާއިން ބުނީ މުޒާހަރާތަކުގެ ބޭނުމަކީ އިސްރާއީލް ސިފައިންނާ ކުރިމަތިލުމަށް ފަލަސްތީނުގެ އާއްމުންނަށް ހިތްވަރު ދިނުން ކަމަށާއި، އެކަމުގެ ޒިންމާ ހަމާސް އާއި އެޖަމާޢަތާ ގުޅިފައިވާ އެހެން ޖަމާޢަތްތަކުން ނަގަން ޖެހޭނެ ކަމަށެވެ. އަދި މުޒަހާރަތައް ސުލްހަވެރިކަމާ އެކު ކުރިއަށް ގެންދިޔުމަށް ޙަމާސް އިން ނުވިސްނާ ކަމަށް އިސްރާއީލް ޚާރިޖިއްޔާ އިން ތުހުމަތުކުރެއެވެ.
ފަލަސްތީނުގެ އާއްމުން ވަނީ ޣައްޒާ އާއި އިސްރާއީލް ގުޅޭ ސަރަހައްދީ ރޮނގުގެ 5 ސަރަހައްދެއްގައި ކޭމްޕް ޖަހާފައެވެ. އެގޮތުން އޭރީޒް ޗެކް ޕޮއިންޓުން ފެށިގެން ރަފާ ހުރަހާ ދެމެދުގެ ސަރަހައްދުތަކުގައި ކޭމްޕް ޖަހާފައިވާ ކަމަށް ރިޕޯޓްތައް ބުނެއެވެ. މުޒާހަރާތައް ދިގުދެމިގެންވާ ގޮތެއްގައި ކުރިއަށްގެންދިޔުމަށް ޓެންޓް ވެސް ޖަހާފައި ވާކަމަށް ރިޕޯޓްތައް ބުނެއެވެ.
މުޒާހަރާތައް ނިންމާލުމަށް ހަމަޖެހިފައި ވަނީ މެއި މަހުގެ 15 ވަނަ ދުވަހުއެވެ. އެދުވަހަކީ 1948 ވަނަ އަހަރު ފަލަސްތީނުގެ ރައްޔިތުން ވިއްސިވިހާލިކޮށްލުމަށް ފަހު އިސްރާއީލު އުފެއްދި ދުވަހުގެ ގޮތުގައި ފަލަސްތީނުން ފާހަގަކުރާ ދުވަހެކެވެ.
މިހަރަކާތާ ދިމާކޮށް އިސްރާއީލް ސިފައިން ވަނީ ގިނަ އަދަދެއްގެ ސިފައިން ސަރަހައްދީ ރޮނގު ކައިރިއަށް ޖަމާކޮށްފައެވެ. އޭގެ ތެރޭގައި 100 ވަރަކަށް ސްނައިޕަރުން ވެސް ހިމެނެއެވެ.
