ގަޓޫސޯގެ ކޮންޓްރެކްޓް މިލާނުން އާކުރަނީ!

އޭސީ މިލާންގެ ކޯޗު ޖެނާރޯ ގަޓޫސޯގެ ކޮންޓްރެކްޓް އާކުރާނެ ކަމުގެ އިޝާރާތެއް އެ ޓީމުން ދީފިއެވެ.

މިލާންގެ ކޯޗުގެ މަގާމަށް ގަޓޫސޯ އައްޔަނުކުރީ 2017 ވަނަ އަހަރުގެ ނޮވެމްބަރުގެ މަހުގެ ތެރޭގައެވެ. ގަޓޫސޯއަށް ކޯޗުގެ މަގާމު ހަވާލުކުރީ އެ މަގާމުގައި ކުރިން ހުރި ވިންސެންޒޯ މޮންޓެލާގެ އިރުޝާދުގެ ދަށުން އެ ޓީމު ދައްކަމުން ދިޔަ ދަށް ކުޅުމާ ގުޅިގެންނެވެ. އޭރު ގަޓޫސޯ ހުރީ އެ ޓީމުގެ ޒުވާން ޓީމުގެ ކޯޗުގެ މަގާމުގައެވެ. ގަޓޫސޯ އޭރު ސޮއިކުރި ކޮންޓްރެކްޓް މި ސީޒަނުގެ ނިޔަލަށް ހަމަވާނެއެވެ.

ގަޓޫސޯގެ އިރުޝާދުގެ ދަށުން އެ ޓީމުގެ ނަތީޖާތައް ރަނގަޅުކުރިއިރު އެ ޓީމަށް ދިމާވި އެންމެ ބޮޑު ގޮންޖެހުމަކީ އާސެނަލް އަތުން ބަލިވެ ޔުއެފާ ޔުރޮޕާ ލީގުން ކެޓުމެވެ. އެހެން ނަމަވެސް އިޓާލިއަން ސެރީއޭގައި އެންމެފަހުން ކުޅުނު ފަސް މެޗު ވެސް އެ ޓީމުން ކާމިޔާބުކޮށްފައިވާއިރު އެ ޓީމު އެންމެފަހުން ކުޅުނު 10 މެޗުން ވެސް ބަލިވެފައެއް ނުވެއެވެ.

އޭސީ މިލާންގެ ސްޕޯޓިން ޑިރެކްޓަރ މަސިމިލިއާނޯ މިރަބޭލީ ބުނެފައި ވަނީ ގަޓޫސޯއަށް ހަދިޔާއެއް ދިނުމަށް ތައްޔާރުވަމުންދާ ކަމަށާއި އެކަމުގައި އެއްވެސް މައްސަލައެއް ނުޖެހޭނެ ކަމުގެ ޔަގީންކަން އެބައޮތް ކަމަށެވެ. އޭނާ ބުނީ ގިނަ މީހުންނަށް ގަޓޫސޯ އެނގެނީ މޮޅު ކުޅުންތެރިއެއްގެ ގޮތުގައި ކަމަށާއި އެހެން ނަމަވެސް ކުރިޔަށް އޮތް ސީޒަންތަކުގައި އޭނާ ވެގެންދާނީ މިލާންއަށް ވަރަށް މުހިންމު ކޯޗަކަށް ކަމަށެވެ. އެހެންކަމުން އޭނާ އެ ޓީމުގައި މަޑުކުރުވުމަކީ ކޮންމެހެން ކުރަންޖެހޭ ކަމެއް ކަމަށާއި އެކަމަށް މަގުފަހި ކުރުމަށް އޭނާއަށް އާ ކޮންޓްރެކްޓެއް ދޭނެ ކަމަށް މިރަބޭލީ ބުނެފައިވެއެވެ.

މިރަބޭލީ ބުނީ ގަޓޫސޯގެ އިރުޝާދުގެ ދަށުން އާ ދައުރެއް ޓީމުން ފެށުމަށް ތައްޔާރުވަމުން އަންނަ ކަމަށާއި ކުރިޔަށް އޮތްއަހަރުތަކުގައި އެ އަމާޒަށް ވާސިލުކޮށްދޭނެ އެންމެ ރަނގަޅު ކޯޗެއްގެ ގޮތުގައި އެ ޓީމުގެ މެނޭޖްމަންޓުން ދެކެނީ ގަޓޫސޯ ކަމަށެވެ. އޭނާ ބުނީ ގަޓޫސޯ އެކަން ކުރާނެ ކަމުގެ ޔަގީންކަން އެބައޮތް ކަމަށާއި އެހެން ނަމަވެސް އާ ޓީމެއް ބިނާކުރުމަކީ ވަގުތު ނަގާނެ ކަމެއް ކަން އެންމެނަށް ވެސް އިނގޭ ކަމަށެވެ.

އިޓާލިއަން ސެރީއޭގައި ކުޅުނު 28 މެޗުން ލިބުނު 50 ޕޮއިންޓާ އެކު މިލާން އޮތީ ތާވަލުގެ ހަވަނައިގައެވެ. ގަޓޫސޯގެ އިރުޝާދުގެ ދަށުން މިލާން ދެން ކުޅޭ މެޗުގައި އެ ޓީމު ނުކުންނާނީ ތާވަލުގެ އެއްވަނަގައި އޮތް ޔުވެންޓަސްއާ ދެކޮޅަށެވެ. މިލާންއަށް 387 މެޗު ކުޅެދީފައިވާ ގަޓޫސޯ ވަނީ އެ ކްލަބާއެކު ދެ ޔުއެފާ ޗެމްޕިއަންސް ލީގާއި ދެ ޔުއެފާ ސުޕާކަޕް އަދި ދެ އިޓާލިއަން ސެރީއޭގެ އިތުރުން ދެ ކޮޕާ އިޓާލިއާ ކާމިޔާބުކޮށްފައެވެ. އިޓަލީގެ ގައުމީ ޓީމާއެކު 2006 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ގަޓޫސޯ މިލާންގެ ކުރިން އެއްވަނަ ޑިވިޝަނުގެ ޓީމަކަށް ކޯޗުކަން ކޮށްދީފައެއް ނުވެއެވެ.