ޕެރެސިޗް ހޯދުމަށް ޔުނައިޓެޑުން ހުށަހެޅި ބިޑް އިންޓަމިލާނުން ރިޖެކްޓްކޮށްފި

އިންޓަ މިލާނަށް ކުޅެމުން އަންނަ ކްރޮއޭޝިއާގެ މިޑްފިލްޑަރު އިވާން ޕެރެސިޗް ހޯދުމަށް މެންޗެސްޓާ ޔުނައިޓެޑުން ހުށަހެޅި ބިޑް އިންޓައިން ރިޖެކްޓްކޮށްލައިފި ކަމަށް ރިޕޯޓްތައް ބުނެފި އެވެ.

އިޓަލީގެ ނޫސްތަކުން ބުނީ ޕެރެސިޗް ހޯދުމަށް ޔުނައިޓެޑުން ހުށަހަޅާފައިވަނީ 40 މިލިއަން ޔޫރޯ ކަމަށާއި، އެހެންނަމަވެސް އިންޓަ އިން އެ ހުށަހެޅުން ބަލައިގަނެފައިނުވާ ކަމަށެވެ. އެގޮތުން އިންޓައިން ބޭނުންވަނީ އޭނާ 55 މިލިއަން ޔޫރޯއަށް ވިއްކާލުމަށްކަމަށްވެސް ރިޕޯޓްތައް ބުނެއެވެ.

ދާދި ފަހުން ޕްރިމިއަމް ސްޕޯޓް އަށް ދިން އިންޓަވިއުއެއްގައި އިންޓަ މިލާންގެ ޑިރެކްޓާ ޕިއެރޯ އޮސީލިއޯ ވިދާޅުވީ، ޕެރެސިޗްއާ ބެހޭ ގޮތުން ޔުނައިޓެޑުން ރަސްމީކޮށް އެއްވެސް ވާހަކައެއް އިންޓަމިލާނާ ދައްކާފައިނުވާ ކަމަށާއި، އެހެންނަމަވެސް ޔުނައިޓެޑުން ޕެރެސިޗްއަށް ޝައުގުވެރިވާކަން ކަށަވަރުކޮށްދެވިދާނެ ކަމަށެވެ.

މީގެއިތުރުން އޮސީލިއޯ ވިދާޅުވީ، ޓީމުގައި ވަރަށް މުހިންމު ކުޅުންތެރިން ތިބޭ ކަމަށާއި، އެތަނުން ކުޅުންތެރިޔަކު ވިއްކާލުމުގެ ކުރިން ކްލަބަށް އެންމެ ފައިދާވާ ގޮތާ މެދުވެސް ވިސްނަން ޖެހޭ ކަމަށެވެ.

އެގޮތުން އޭނާ ވިދާޅުވީ، އިންޓަގެ ރަނގަޅު ސްކޮޑެއް އެބައޮތް ކަމަށާއި، އެހެންނަމަވެސް އިންޓައަށްވުރެ ފެންވަރު ދަށް ސްކޮޑު ހިމެނޭ ޓީމުތައް އިންޓައަށްވުރެ ކުރީގައި ލީގު ނިންމާލާފައިވާ ކަމަށެވެ.

ޖަރުމަންގެ ވޮލްފްސްބާގް އިން 2015 ވަނަ އަހަރު އިންޓަމިލާނަށް ބަދަލުވި ޕެރެސިޗް ވަނީ އެޓީމަށް މިވީތަނަށް ކުޅުނު 79 މެޗުގައި 20 ލަނޑު ކާމިޔާބުކޮށްފައެވެ. މީގެއިތުރުން ޕެރެސިޗް ވަނީ ވޮލްފްސްބާގްއާ އެކު ޖަރުމަން ކަޕް އަދި ޖަރުމަން ސުޕާކަޕް ކާމިޔާބުކޮށްފައެވެ.

ބްރޯޝިއާ ޑޯޓްމަންޑް އަށްވެސް ކުޅެފައިވާ ޕެރެސިޗް ވަނީ އެޓީމަށް ކުޅުނު 64 މެޗުގައި 12 ލަނޑު ކާމިޔާބުކޮށް، ބުންޑަސްލީގާ އަދި ޖަރުމަން ކަޕް އެޓީމާއެކު ކާމިޔާބުކޮށްފައެވެ.