އިބްރާހިމޮވިޗް ހޯދުމަށް އޭސީ މިލާނުން މަސައްކަތްނުކުރޭ: އެޖެންޓް

މެންޗެސްޓާ ޔުނައިޓެޑަށް ކުޅެމުން އައި ސްވިޑެންގެ ކުރީގެ ކެޕްޓަން ޒްލާޓަން އިބްރާހިމޮވިޗް ހޯދުމަށް އޭސީ މިލާނުން މަސައްކަތްނުކުރާކަމަށް އޭނާގެ އެޖެންޓް މިނޯ ރިއޯލާ ބުނެފިއެވެ.

ޑެލޯ ސްޕޯޓަށް ދިން އިންޓަވިއުއެއްގައި ރިއޯލާ ބުނީ އިބްރާހިމޮވިޗް ހޯދުމަށް ގިނަ ކްލަބްތަކުން މަސައްކަތްކުރަމުން އަންނަ ކަމަށާއި، އެހެންނަމަވެސް އޭގެ ތެރޭގައި އިޓަލީގެ އޭސީ މިލާން ނުހިމެނޭ ކަމަށެވެ.

ޔުނައިޓެޑުން އިބްރާހިމޮވިޗް ރިލީޒްކޮށްފައިވާއިރު، އޭނާ ކުރިޔަށް އޮތް ސީޒަނުގައި ކުޅޭނެ ކްލަބެއް އަދި ކަށަވަރެއް ނުވެއެވެ. އެހެންނަމަވެސް ރިއޯލާ ބުނީ އެމެރިކާ ލީގުންވެސް އިބްރާހިމޮވިޗް ހޯދަން މަސައްކަތްކުރާ ކަމަށާއި، ނަޕޯލީއަށް ދާން އޭނާ ބޭނުންނުވާ ކަމަށެވެ.

އިބްރާހިމޮވިޗްގެ ލިގަމެންޓަށް މިދިޔަ އެޕްރީލްމަހު ލިބުނު އަނިޔާއަށް އޭނާ ފަރުވާ ހޯދަމުންދާއިރު، އެ އަނިޔާއިން އަރައިގަންނަންވެސް އޭނާ އަންނަނީ މަސައްކަތްކުރަމުންނެވެ. އެގޮތުން ރިޕޯޓްތައް ބުނާގޮތުން އިބްރާހިމޮވިޗް ޓްރާންސްފާގެ ކަންތައް ނިންމާނީ އަނިޔާއިން އަރައިގަނެވުމުންނެވެ.

އިބްރާހިމޮވިޗްއަށް ގިނަ ކުލަބު ތަކަކުން ފާރަލަމުން އަންނަ އިރު މީގެ ކުރިން އޭނާގެ އޭޖެންޓް މީނޯ ރިއޯލާ ބުނީ އިބްރާހިމޮވިޗްގެ ބޭނުން ޔުނައިޓެޑަށް ނުހިފޭނަމަ ދެން އޭނާ ބަދަލުވާނީ އަނެއްކާވެސް ޕްރިމިއާ ލިގުގެ ކްލަބަކަށް ކަމަށެވެ.

ފާއިތުވި ސީޒަނުގައި ފްރާންސްގެ ޕީއެސްޖީއަށް ކުޅުމަށްފަހު މިސީޒަނުގައި ޔުނައިޓެޑާއި ގުޅި އޭނާ ވަނީ އެޓީމަށް 46 މެޗު ކުޅެދީ 28 ލަނޑު ކާމިޔާބުކޮށްދީފައެވެ.