ރެއާލް މެޑްރިޑާއިއެކު އިސްކޯ ހަފާދައިވާ ކޮންޓްރެކްޓް އާކުރަނީ

ވަރަށް އަވަހަށް ރެއާލް މެޑްރިޑާއިއެކު ހަދާފައިވާ ކޮންޓްރެކްޓް އާކުރާނެ ކަމަށް އެކުލަބަށް ކުޅޭ ސްޕެއިނުގެ ތަރި އިސްކޯ ބުނެފިއެވެ. އިސްކޯ މިހެން ބުނެފައިވާއިރު އިނގިރޭސި ކްލަބް މެންޗެސްޓާ ސިޓީއިން އަންނަނީ މިފަހަރުގެ ޓްރާންސްފާގައި އޭނާ ހޯދުމަށް މަސައްކަތް ކުރަމުންނެވެ. ނަމަވެސް އާދިއްތަ ދުވަހުގެރޭ ވޯލްޑްކަޕް ކޮލިފައިންގައި 2-1 ގެ ނަތީޖާއަކުން މެސެޑޯނިޔާއަތުން ސްޕެއިން މޮޅުވި މެޗަށްފަހު ވާހަކަދައްކަމުން އިސްކޯ ބުނެފައިވަނީ، އޭނާ ރެއާލްގައި

މަޑުކުރަން ބޭނުންވާ ކަމަށާއި، ކޮންޓްރެކްޓް އާކުރުމުގެ މަޝްވަރާތައް މިހާރު ކުރަމުން އަންނަ ކަމަށެވެ.

މެޗަށްފަހު ވާހަކަ ދައްކަމުން އިސްކޯ ބުނެފައިވަނީ، ރެއާލްގައި އޭނާ ހުރީ ވަރަށް އުފަލުން ކަމަށާއި، އޭނާ ބޭނުންވަނީ ގިނަ އަހަރުތަކަކު ކުލަބުގައި މަޑުކުރުމަށް ކަމަށެވެ. އެގޮތުން ރެއާލް އާއި އެކު ޗެމްޕިއަންސް ލީގު ކާމިޔާބު ކުރުމަށްފަހުގައިވެސް އިސްކޯ ވަނީ ރެއާލްގައި މަޑުކުރަން ބޭނުންވާ ކަމަށް ބުނެފައެވެ.

ރެއާލް މެޑްރިޑާއި އެކު އިސްކޯ ހަދާފައިވާ ކޮންޓްރެކްޓްގައި ބާކީ އަދި އެއް އަހަރު އޮތްއިރު، ފާއިތުވި ސިޒަނާއި ގުޅޭ ގޮތުން ވާހަކަ ދައްކަމުން އިސްކޯ ބުނީ، ފާއިތުވި ސީޒަނަކީ އޭނާ މިހާތަނަށް ނިންމާލީ އެންމެ ކާމިޔާބު ސީޒަން ކަމުގައިވެސް ބުނެވިދާނެ ކަމަށާއި، ސީޒަން ފެށުނު އިރުގައިވެސް ކާމިޔާބުކަމާއިއެކު ސީޒަން ނިންމާލެވޭނެކަމުގެ އިތުބާރު އޮތްކަމަށެވެ.

ފާއިތުވި ތިން މަސްދުވަހުގެ ތެރޭގައި އިސްކޯ ހޯދުމަށް ރެއާލް މެޑްރިޑާއި އެންމެ ވާދަވެރި ބާސެލޯނާއިން އަދި އިނގިރޭސި ދަގަ ބާރު މެންޗެސްޓާ ސިޓީއިން ވަނީ މަސައްކަތް ކޮށްފައެވެ. އެގޮތުން މިފަހަރުގެ ޓްރާންސްފާގައި ސިޓީއަށް އޭނާ ބަދަލުވާނެކަމަށް ގިނަ ފަރާތްތަކަކުން ވަނީ ދެކިފައެވެ. ނަމަވެސް މީގެ ކުރިން ރެއާލްގެ ކޯޗް ޒައިނަދިން ޒިދާންވެސް ބުނެފައިވަނީ، އިސްކޯގެ މުސްތަގުބަލު އޮތީ ރެއާލް މެޑްރިޑާއި އެކުގައި ކަމަށެވެ.