ބާސާގެ އިނިއެސްޓާއަށް އިންޓަ މިލާނުން ފާރަލާން ފަށައިފި

ބާސެލޯނާއަށް ކުޅެމުން އަންނަ ސްޕެއިންގެ މީޑްފީލްޑަރު އަންދްރޭސް އިނިއެސްޓާއަށް އިންޓަމިލާނުން ފާރަލާން ފަށާފައިވާ ކަމަށް ރިޕޯޓްތައް ބުނެފިއެވެ.

ދުނިޔޭގެ މަޝްހޫރު ގިނަ ކްލަބްތަކުން ހޯދުމަށް މަސައްކަތްކުރަމުން އަންނަ އިނިއެސްޓާ އެ ކްލަބާއެކު ހަދާފައިވާ އެއްބަސްވުން 2018 ވަނަ އަހަރު ހަމަވާއިރު، އިންޓަމިލާނުން އަންނަނީ އިނިއެސްޓާ ހޯދުމަށް އޮތް މަގުތައް ބަލަމުން ކަމަށެވެ.

އެގޮތުން ރިޕޯޓްތައް ބުނާގޮތުން އިންޓަމިލާންގެ ސްޕޯޓިން ޑިރެކްޓަރު ޕިއެރޯ އޮސީލޯ ވަނީ ބާސާއާއެކު އިނިއެސްޓާއާ ބެހޭގޮތުން މަޝްވަރާކޮށްފައެވެ. އެ ބައްދަލުވުން ހިނގީ މި ހަފްތާގެ ހޯމަ ދުވަހު ކަމަށްވެސް ރިޕޯޓްތައް ބުނެއެވެ.

އިންޓަ މިލާނުން އަންނަނީ ކުރިއަށް އޮތް ސީޒަނަށް ކުޅުންތެރިން ހޯދުމަށް ގިނަ މަސައްކަތްތަކެއް ކުރަމުންނެވެ.

ބާސާ އިން ކެރިޔަރު ފެށި އިނިއެސްޓާ ވަނީ މިހާތަނަށް އެޓީމަށް ކުޅުނު 630 މެޗުގައި 55 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެޓީމާއެކު 8 ސްޕެނިޝް ލީގު، ފަސް ކޮޕާޑެލްރޭ އަދި ހަތަރު ޗެމްޕިއަންސް ލީގު ކާމިޔާބުކޮށްފައެވެ.

ސްޕެއިން ގައުމީ ޓީމާއެކު ފީފާ ވޯލްޑްކަޕް އަދި ޔޫރޯ ފުޓުބޯޅަ މުބާރާތް ކާމިޔާބުކޮށްފައިވާ އިނިއެސްޓާ ވަނީ މިހާތަނަށް އެޓީމަށް ކުޅުނު 119 މެޗުގައި 12 ލަނޑު ކާމިޔާބުކޮށްފައެވެ.