ވެނެޒުއޭލާގެ ޕޮލިސް ކަސްޓޯޑިއަލްއެއްގައި ރޯވެ 68 މީހުން މަރުވެއްޖެ
29 މާރިޗު 2018 | ބުރާސްފަތި 10:45އަލިފާން ރޯވާން ދިމާވި ސަބަބެއް ރަސްމީކޮށް އަދި އެނގިފައެއްނުވޭ
އަލިފާނުގެ ހާދިސާގައި މަރުވި ގިނަ މީހުންނަކީ ގައިދީން
ވެނެޒުއޭލާގެ ކަރަބޮބޯ ސްޓޭޓްގެ ސިޓީއެއް ކަމަށްވާ ވެލެންސިއާގެ ފުލުހުންގެ މަރުކަޒެއްގައި ހިނގި އަލިފާނުގެ ހާދިސާގައި 68 މީހުން މަރުވެއްޖެ ކަމަށް އެގައުމުގެ ސަރުކާރުން ބުނެފިއެވެ.
ރިޕޯޓްތައް ބުނާ ގޮތުގައި އަލިފާން ރޯވެފައި ވަނީ ޖަލުފަޅާލުމަށް ރާވައި ބުދަ ދުވަހު ގައިދީން ގޮދަޑިއެއްގައި ރޯކޮށްލުމުންނެވެ.
އަލިފާން ރޯވި ޚަބަރާ އެކު ސްޓޭޝަންގެ ކައިރިއަށް ދިޔަ ގައިންދީންގެ ގާތް ފަރާތްތައް ފޮނުވާލުމަށް ފުލުހުން ވަނީ ކަރުނަގޭސް ބޭނުންކޮށްފައެވެ.
ޗީފް ސްޓޭޓް ޕްރޮސިކިއުޓަރ ތާރިކް ސާބް ވިދާޅުވީ ހާދިސާ ހިނގި ގޮތުގެ ތަހުގީގެއް ވަގުތުން ފަށަންޖެހޭ ކަމަށެވެ.
ދައުލަތުގެ އޮފިޝަލެއް ކަމަށްވާ ޖީސަސް ސަންޓެންޑަރ ވިދާޅުވީ ގައިދީން ހަމައަކަށް އަޅުވައި ތަން ކޮންޓްރޯލްކޮށްފައި ވާކަމަށެވެ.
އަލިފާން ރޯވާން ދިމާވި ސަބަބެއް ރަސްމީކޮށް އަދި އެނގިފައެއް ނުވެއެވެ.
ޖަލުތަކަށް ފާރަވެރިވާ ޖަމާއަތެއް ކަމަށްވާ "އެސޯސިއޭޝަން އުނަ ވެންޓަނާ އަ ލަ ލިބަރޭޓެޑް" އިން ބުނީ ޖަލުގެ އޮފިސަރަކު ގައިދީއެއްގެ ފަޔަށް ބަޑި ޖެހީ ކަމަށާއި އެއާ އެކު ގައިދީން ކުޑަ ވަގުތުކޮޅެއްގެ ތެރޭގައި ގޮދަޑިއެއްގައި ހުޅުޖެހީ ކަމަށެވެ.
ސަންޓެންޑަރ ވަނީ ފުލުހެއްގެ ގަޔަށް ބަޑިޖަހާފައި ވާކަން ކަށަވަރުކޮށްދީފައެވެ.
މީހުން ސަލާމަތްކުރުމުގެ މަސައްކަތްކުރި ފަރާތްތަކުން ވަނީ ތަނުގެ ތެރޭގައި ތާށިވެފައި ތިބި ފަރާތްތައް ސަލާމަތްކުރުމަށް ފާރުތަޅާލައިގެން ވެސް މަސައްކަތްކޮށްފައި ކަމަށް ރިޕޯޓްތައް ބުނެއެވެ.
ސާބް ވިދާޅުވި ގޮތުގައި ޖަލަށް އެވަގުތު ޒިޔާރަތްކުރި ދެ އަންހެނަކު ފިޔަވައި މަރުވި އެންމެންނަކީ ވެސް ގައިދީން ކަމަށް ސާބް ވިދާޅުވިއެވެ.
