އުއްތަމަ ފަނޑިޔާރާއި ކުރީގެ ރައީސް މައުމޫން ހައްޔަރުކުރަން ސަލާމަތީ ހިދުމަތްތަކުން ލަދު ގަންނަންޖެހޭ: ސައުދު
ސަލާމަތީ ހިދުމަތްތައް ސިޔާސީ ނުފޫޒުން ދުރުވާންޖެހޭ
ރައްޔިތުންގެ މަޖިލީހުގެ މެމްބަރު ސައުދު ހުސައިން
ސިޔާސީ ނުފޫޒުން އަދި ސަރުކާރު ބޭނުންހާ ގޮތަކަށް ކަންކަން ކުރުމާއި ދައުލަތުގެ ތިން ބާރުގެ ތެރެއިން އަދުލްއިންސާފުގެ ދާއިރާގެ އެންމެ އިސް ފަނޑިޔާރު އަބްދުﷲ ސައީދާއި ކުރީގެ ރައީސް މައުމޫން އަބްދުލްގައްޔޫމް ހައްޔަރުކޮށްގެން ގެންގުޅެން ދައުލަތުގެ ސަލާމަތީ ހިދުމަތްތަކުން ލަދު ގަންނަންޖެހޭ ކަމަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.
ކުރީގެ ރައީސް މައުމޫން ޖަލުގައި އޮންނަވާތާ 50 ދުވަސް ފުރުމާ ގުޅިގެން، ސިޔާސީ ޕާޓީތަކުން އަންގާރަ ދުވަހުގެ ރޭ އެމްޑީޕީ ހަރުގޭގައި ބޭއްވި އެއްވުމުގައި ވާހަކަ ދައްކަވަމުން ސައުދު ވިދާޅުވީ ގައުމު ހަމަ މަގަށް އެޅުމުގެ ޒިންމާ ދައުލަތުގެ ސަލާމަތީ ހިދުމަތުގެ މައްޗަށް ވަރަށް ބޮޑު ކަމަށާއި ނަމަވެސް ޒިންމާ ނަގާތަން ނުފެންނަ ކަމަށެވެ.
"ރައީސް މައުމޫނާއި ރާއްޖޭގެ އުއްތަމަ ފަނޑިޔާރާއި އަދިވެސް އެހެނިހެން ސިޔާސީ ލީޑަރުންނާއި ރައްޔިތުންގެ މަޖިލީހުގެ މެމްބަރުން ރަހީނު ކޮށްގެން ގެންގުޅޭ ކަމަށް ވަންޏާ މިއަދު ސަލާމަތީ ހިދުމަތްތަކުގެ ހިދުމަތްތެރިން ލަދު ގަންނަންޖެހޭނެ. މިރާއްޖޭ ހަމަ މަގަށް އެޅުވުމުގެ ޒިންމާ އަދާކުރަންޖެހޭނީ ސަލާމަތީ ހިދުމަތްތައް. ސަލާމަތީ ހިދުމަތްތައް ފެއިލް ވެއްޖިއްޔާ ދިވެހި ރައްޔިތުން ނިކުންނާނެ، ސަލާމަތީ ހިދުމަތްތައް ވެސް ހަމަ މަގަށް އަޅުވަން،" ސައުދު ވިދާޅުވިއެވެ.
ސައުދު ވިދާޅުވީ ރައީސް ޔާމީންގެ މި ސަރުކާރުން ގާނޫނުއަސާސީއާ ހިލާފަށް ކަންކަން ކުރަމުންދާ ކަމަށާއި މިހާރު ވެސް މިސަރުކާރު ދުވަމުން ދަނީ ގާނޫނުއަސާސީއާ ދުރަށް ކަމަށެވެ.
މީގެ އިތުރުން ސައުދު ވިދާޅުވީ ގުޅިފައިވާ ސިޔާސީ ޕާޓީތަކުން ކުރަމުންދާ މަސައްކަތްތަކީ މިސަރުކާރުން ގާނޫނުއަސާސީއާ ހިލާފަށް ކުރާ ކަންކަން ފާހަގަކޮށް ގާނޫނީ އިމުގެ ތެރެއަށް ސަރުކާރު ވެއްދުމަށް ކުރަމުންދާ މަސައްކަތެއް ކަމަށެވެ.
މީގެ އިތުރުން ސައުދު ވިދާޅުވީ ގާނޫނުއަސާސީއާ ހިލާފަށް ރާއްޖޭގައި އެއްވެސް ވެރިޔަކަށް ވެރިކަން ނުކުރެއްވޭނެ ކަމަށެވެ. މިއަދު ރާއްޖޭގެ ހަމަނުޖެހުން އުފެދިފައި ވަނީ ސުޕްރީމް ކޯޓުން ނެރުނު އަމުރެއް ސަރުކާރުގެ ނުފޫޒުން ތަންފީޒު ކުރުމަށް ދެކޮޅު ހެދުން ކަމަށް ވެސް ސައުދު ވިދާޅުވިއެވެ.
ދިވެހިރާއްޖެ ފާލުން ނެއްޓިގެން ގޮސްފައި މިވަނީ 1 ފެބްރުއަރީގައި ސުޕްރީމް ކޯޓުން ނެރުނު އަމުރު ތަންފީޒު ކުރުމަށް ތަންފީޒީ އިދާރާތަކުން ދެކޮޅު ހެދުމުން ކަމަށް ވެސް ސައުދު ވިދާޅުވިއެވެ.
