ބްރެޒިލް ނުކުންނާނީ ބަދަލުހިފަން، އެކަމަށް ނުވިސްނާނަން: ގުންޑޮގަން

މާދަމާ ރޭ ޖަރުމަނާއި ދެކޮޅަށް ކުޅޭ ރަހުމަތްތެރިކަމުގެ މެޗުގައި ބްރެޒިލް ނުކުންނާނީ ބަދަލުހިފަން ކަމަށް ޖަރުމަނުގެ މިޑްފީލްޑަރު އައިކޭ ގުންޑޮގަން ބުނެފިއެވެ.

ބައިނަލްއަގްވާމީ ފުޓްބޯޅައިގައި އެންމެ ވާދަވެރި ދެ ޓީމުގެ ގޮތުގައި ގިނަ ބަޔަކު ދެކެނީ ބްރެޒިލް އަދި ޖަރުމަނެވެ. އަމިއްލަ ގައުމުގައި 2014 ވަނަ އަހަރު ބޭއްވި ވޯލްޑް ކަޕްގެ ސެމީ ފައިނަލުން ބްރެޒިލް ކެޓީ 7-1 ގެ ލަދުވެތި ނަތީޖާއަކުން ޖަރުމަނު އަތުން ބަލިވެގެންނެވެ. އެހެންކަމުން ޖަރުމަނާ ދެކޮޅަށް އަންގާރަ ދުވަހުގެ ރޭ ކުޅޭ ރަހުމަތްތެރިކަމުގެ މެޗުގައި ބްރެޒިލް ނުކުންނާނީ އެކަމަށް ބަދަލުހިފަން ކަމަށް ގިނަ ބަޔަކު އަންނަނީ ބުނަމުންނެވެ.

ޖަރުމަނުގެ ގައުމީ ޓީމަށް 2011 ވަނަ އަހަރުން ފެށިގެން ކުޅެމުން އަންނަ ގުންޑޮގަން އަށް 2014 ވަނަ އަހަރުގެ ވޯލްޑް ކަޕް ގެއްލުނީ އޭނާގެ ކަކުލަށް ލިބުނު އަނިޔާއެއްގެ ސަބަބުންނެވެ. އެކަމާ ގުޅޭ ގޮތުން ވާހަކަ ދައްކަމުން ގުންޑޮގަން ބުނީ ޓީވީން މެޗު ބަލަން އިންއިރު އޭނާ އިނނީ ބޮޑު ޝޮކެއްގައި ކަމަށާއި ވޯލްޑް ކަޕް ފަދަ ބޮޑު މުބާރާތެއްގައި އެފަދަ ނަތީޖައެއް ނުކުމެދާނެ ކަމަށް ދުވަހަކު ވެސް އުއްމީދުނުކުރާ ކަމަށެވެ. ގުންޑޮގަން ބުނީ ބްރެޒިލްއަކީ މިއަހަރު ރަޝިއާގައި ބާއްވާ ވޯލްޑް ކަޕްގެ ފެވަރިޓެއްގެ ގޮތުގައި ދެކޭ ކަމަށާއި ބްރެޒިލްގެ ރައްޔިތުންގެ މެދުގައި ފުޓްބޯޅައަކީ ވަރަށް ހާއްސަ އަދި މަތީ ދަރަޖައެއް ދެވިފައިވާ ކުޅިވަރެއް ކަމަށެވެ.

އޭނާ ބުނީ މިހާރު އޮތް ބްރެޒިލްގެ ޓީމަކީ މީގެ ކުރިން 2014 ވަނަ އަހަރު ކުޅުނު ޓީމާ އެއްވެސް ވަރެއްގެ ގުޅުމެއް އޮތް ޓީމެއް ނޫން ކަމަށާއި 7-1 އިން މޮޅުވި މެޗަގެ ވާހަކައަކީ މިހާރު މުހިންމު ވާހަކައެއްގެ ގޮތުގައި ނުދެކޭ ކަމަށެވެ. އޭނާ ބުނީ ބްރެޒިލް އަދި ޖަރުމަނަކީ ވެސް ދުނިޔޭގެ ފުޓްބޯޅައިގެ ގަދަ ދެ ބާރަށް ވުމާ އެކު މި ދެ ޓީމު ބައްދަލުކުރާ ކޮންމެ މެޗަކީ ވެސް ވަރަށް ހާއްސަ މެޗުތަކެއް ކަމަށެވެ.

ޖަރުމަނު 2012 ވަނަ އަހަރުގެ ޔޫރޯގެ ސެމީ ފައިނަލަށް ދަތުރުކުރި އިރު ގުންޑޮގަން އެއްވެސް މެޗެއްގައި ކުޅެފައިނުވާއިރު އޭގެ ފަހުން ކުޅުނު ވޯލްޑް ކަޕް އަދި 2016 ވަނަ އަހަރުގެ ޔޫރޯ ވެސް އޭނާއަށް ގެއްލުނީ އަނިޔާގެ ސަބަބުންނެވެ. އެހެން ނަމަވެސް މި ސީޒަނުގައި އޭނާ އަންނަނީ އަނިޔާ އިން އެނބުރި އައިސް މެންޗެސްޓާ ސިޓީގައި މޮޅު ކުޅުމެއް ދައްކަމުންނެވެ. މިކަމުގެ ސަބަބުން އޭނާއަށް ވޯލްޑް ކަޕަށް ގެންދާ ޖަރުމަނުގެ ސްކޮޑުން ފުރުސަތު ލިބޭނެ ކަމަށް ރިޕޯޓުތައް ބުނެއެވެ.

ހުކުރު ދުވަހު ސްޕެއިންއާ ދެކޮޅަށް ކުޅެ 1-1 އިން އެއްވަރުވި މެޗުގައި ގުންޑޮގަން ކުޅެން ނުކުމެފައި ވަނީ ބެންޗުންނެވެ. އެކަމާ ގުޅޭ ގޮތުން ވާހަކަ ދައްކަމުން އޭނާ ބުނީ ވޯލްޑް ކަޕަށް ވަގުތު ކުޑަތަންވެފައި ވަނިކޮށް ރަނގަޅު ފޯމެއްގައި ހުރެވުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށާއި ފިޓުކޮށް ހުރެ ވޯލްޑް ކަޕަށް ދާ ޖަރުމަނުގެ ސްކޮޑުން ފުރުސަތު ހޯދަން ބޭނުންވާ ކަމަށެވެ.

ގުންޑޮގަން ވަނީ ޖަރުމަނުގެ ގައުމީ ޓީމަށް 23 މެޗު ކުޅެދީ ހަތަރު ލަނޑު މިހާތަނަށް ޖަހައިދީފައެވެ.