ރަޝިއާގެ ބައެއްގެ ގޮތުގައިބަލާ ސައިބީރިޔާގެ ބޯޓްދެލި ނަގާ ސަރަހައްދެއް ކަމަށްވާ ކެމެރޯވޯ ސިޓީގެ މޯލްއެއްގައި ހިނގި އަލިފާނުގެ ހާދިސާގައި މަރުވި މީހުންގެ އަދަދު 53 އަށް އަރައިފިއެވެ.

މުނިފޫހިފިލުވުމުގެ ހަރަކާތްތަކާއި ބާޒާރު ކުރުމަށް ޚާއްސަ މި މޯލްގައި ހިނގި އަލިފާނުގެ ހާދިސާގައި މަރުވި މީހުންގެ ތެރޭގައި 40 އަށް ވުރެ ގިނަ ކުދިން ހިމެނިފައިވާނެ ކަމަށް އޮފިޝަލުން ލަފާކުރެއެވެ. މީގެ އިތުރުން 10 ކުއްޖަކު އަދިވެސްވަނީ ނުފެނިއެވެ.

ވިންޓަރ ޗެރީ ކޮމްޕްލެކްސްގެ އެންމެ މަތީ ފްލޯގައި އަލިފާން ރޯވި މިހާދިސާގައި މަރުވި ގިނަ މީހުންނަކީ ސިނަމާގައި ތިބި މީހުންނެވެ.

ސޯޝަލް މީޑިއާގައި ޕޯސްޓް ކޮށްފައިވާ ވީޑިއޯތަކުން ފެންނަގޮތުގައި އަލިފާނުން ސަލާމަތްވުމަށް ކުޑަދޮރުތަކުން މީހުން ފުންމާލާތަން ފެނެއެވެ.

ރަޝިއާގެ ތަހުގީގު ޓީމުން ނެރެފައިވާ ބަޔާނެއްގައި ބުނެފައިވަނީ ފުރަތަމަ ބެލި ބެލުންތަކުން އެނގޭ ގޮތުގައި ދެ ސިނަމާއެއްގެ މައްޗަށް އިމާރާތުގެ ފުރާޅު ވެއްޓިފައިވާ ކަމަށެވެ.

ކަމާއިބެހޭ އިދާރާތަކުން ހާދިސާގެ ތަހުގީގު ފަށާފައިވާއިރު ހާދިސާ ހިނގި ސަބަބު އަދި އެނގިފައެއް ނުވެއެވެ.

އަލިފާން ނިއްވުމަށް 17 ގަޑިއިރު ހޭދަވެފައިވާއިރު މީހުން ސަލާމަތްކުރުމުގެ މަސައްކަތުގައި 660 މީހުން މަސައްކަތް ކޮށްފައިވެއެވެ.

ބޯޓް ދެލި އުފައްދާ މައި ސަރަހައްދެއް ކަމަށްވާ ކެމެރޯވޯ އޮންނަނީ މޮސްކޯގެ އިރުން 2،200 މޭލު ދުރުގައެވެ.