ކެޓަލޯނިއާގެ ކުރީގެ ލީޑަރު ކާލްސް ޕުއިޖެމޮންޓް ހައްޔަރުކޮށްފި

ކެޓަލޯނިއާގެ ކުރީގެ ލީޑަރު ކާލްސް ޕުޖްޑެމޮންޓް ޖަރުމަނުވިލާތުން ހައްޔަރުކޮށްފި އެވެ.

ބަޣާވާތް ކުރަން އުޅުނު ކަމުގެ ތުހުމަތުގައި ސްޕެއިންގެ ސަރުކާރުން ހޯދަމުންދާ ޕުޖްޑެމޮންޓްގެ މައްޗަށް ޔޫރަޕިއަން އެރެސްޓް ވޮރަންޓެއް ނެރެފައިވާއިރު، އެ އަމުރުގެ ދަށުން ޕުޖްޑެމޮންޓް ހައްޔަރު ކުރިކަން ޖަރުމަނުގެ ފުލުހުން ވަނީ ކަށަވަރުކޮށްދީފައެވެ.

ކެޓަލޯނިއާގެ މިނިވަން ދައުލަތެއް އުފެއްދުމަށް ކުރި މަސައްކަތްތަކާއި ގުޅިގެން ސްޕެއިންގެ މައި ސަރުކާރުން ކެޓަލޯނިއާގެ ސަރަހައްދީ ސަރުކާރު އުވާލިފަހުން، ޕުޖްޑެމޮންޓް ދިރިއުޅުއްވަނީ އަމިއްލަ އަށް އަރުވާލެވިގެން ބެލްޖިއަމްގައެވެ.

ސްޕެއިންގެ ޕްރޮސެކިއުޓަރުން ޕުޖްޑެމޮންޓްގެ މައްޗަށް ކުރާ ކުށުގެ ތުހުމަތުތައް އޭނާގެ މައްޗަށް ސާބިތުވެއްޖެނަމަ، ގިނަވެގެން 30 އަހަރުގެ ޖަލު ހުކުމެއް އަންނާނެ އެވެ.

ޕުޖްޑެމޮންޓް ހައްޔަރު ކޮށްފައި ވަނީ ޖަރުމަނާއި ޑެންމާކް ގުޅޭ ސަރަހައްދީ ރޮނގުގެ ކައިރިން ކަމަށް ޕުޖްޑެމޮންޓްގެ ޕާޓީގެ ތަރުޖަމާނާއި ހަވާލާދީ މީޑިއާ ރިޕޯޓްތައް ބުނެއެވެ.

ޕުޖްޑެމޮންޓް ހައްޔަރު ކުރިކަން ހާމަ ކުރުމަށް ޖަރުމަނުގެ ފުލުހުން ނެރުނު ބަޔާނުގައި ވަނީ، އޭނާ ހައްޔަރު ކޮށްފައި ވަނީ ޑެންމާކާއި ޖަރުމަނާއި ގުޅޭ ސަރަހައްދީ ރޮނގުގެ ކައިރީގައިވާ ޖަރުމަނުގެ އުތުރުގެ ސްޓޭޓެއް ކަމަށްވާ ޝްކްލެސްވިގް-ހޯލްސްޓެއިންގެ ފްލެންސްބަގް ސިޓީގެ އޭ7 ހައިވޭ އިން ކަމަށެވެ.

އެހެންނަމަވެސް ހައްޔަރު ކުރުމަށްފަހު، ޕުޖްޑެމޮންޓް ބަންދުކޮށްފައިވާ ތަނަކާއި ބެހޭ މައުލޫމާތު ފުލުހުން ހާމަކޮށްފައެއްނުވެއެވެ.

ޖަރުމަނުން ޕުޖްޑެމޮންޓް ހައްޔަރު ކުރުމުގެ ކުރިން އޭނާ ވަނީ ފިންލެންޑްގެ ގާނޫނު ހަދާ މަޖިލީހުގެ މެމްބަރުންނާއި ބައްދަލު ކުރުމަށް ފިންލެންޑަށް ވަޑައިގެންފައެވެ. އެހެންނަމަވެސް ޕުޖްޑެމޮންޓާއި ދެކޮޅަށް ނެރެފައިވާ ޔޫރަޕިއަން އެރެސްޓް ވޮރަންޓަށް އެގައުމުން އަމަލު ކުރާނެ ކަމަށް ބެލެވުމާއެކު އޭނާ ވަނީ ހުކުރު ދުވަހު އެގައުމު ދޫކޮށް ވަޑައިގެންފައެވެ.

ޕުޖްޑެމޮންޓްގެ ވަކީލުން ވަނީ، ފިންލެންޑް ދޫކޮށް ބެލްޖިއަމްގެ ބްރަސަލްސް އަށް އޭނާ ދަތުރު ފަށްޓަވާފައިވާކަން ހޮނިހިރު ދުވަހު ކަށަވަރުކޮށްދީފައެވެ.

ޕުއިޖެމޮންޓް ހައްޔަރު ކޮށްފައި މިވަނީ ކެޓަލޯނިއާގެ ސަރަހައްދީ އައު ސަރުކާރުގެ ވެރިޔަކު އައްޔަން ކުރުމުގެ މައްސަލާގައި ކެޓަލޯނިއާގެ މަޝްރަޚު ހަލަބޮލިވެފައިވާ ދަނޑިވަޅެއްގައެވެ.

ކެޓަލޯނިއާގެ އައު ރައީސްގެ ގޮތުގައި އެންމެ ފަހުން އިއުލާން ކުރި ކެންޑިޑޭޓް ޖޯޑީ ޓުރުލް ހައްޔަރު ކުރުމާއި ގުޅިގެން، ކެޓަލޯނިއާގެ ވަކި ދައުލަތަކަށް ތާއީދުކުރާ ފަރާތްތަކުން ވަނީ އައު ރައީސްގެ މަގާމަށް ކެންޑިޑޭޓަކު ކަނޑައެޅުމުގެ މަސައްކަތް ހުއްޓާލާފައެވެ.

ސްޕެއިންގެ ސުޕްރީމް ކޯޓުން ހުކުރު ދުވަހު ވަނީ، ކެޓަލޯނިއާގެ ވަކި ދައުލަތަކަށް ތާއީދުކުރާ ސިޔާސީ އިސް ފަރާތްތަކުގެ ތެރެއިން އިތުރު 6 މީހަކު ހައްޔަރު ކުރުމުގެ ބައިނަލްއަޤްވާމީ އަމުރު ނެރެފައެވެ.

މީގެ އިތުރުން ކެޓަލޯނިއާގެ މިނިވަން ދައުލަތެއް އެކުލަވާލުމާއިމެދު މިދިޔަ އަހަރު ނެގި ފެންނަ ނުފެންނަ ވޯޓުގެ މައްސަލާގައި، އެކަމުގައި އިސްކޮށް އުޅުނު އިތުރު ފަސް މީހަކު ސްޕެއިންގެ ފުލުހުން ވަނީ ހައްޔަރު ކޮށްފައެވެ.

މިކަމާއި ގުޅިގެން ކެޓަލޯނިއާގެ މިނިވަން ދައުލަތަކަށް ތާއީދުކުރާ އާއްމުން ވަނީ ހުކުރު ދުވަހު ކެޓަލޯނިއާގެ މަގުތަކަށް ނުކުމެ މުޒާހަރާކޮށްފައެވެ. މިމުޒާހަރާތަކުގައި ރަޔަޓް ފުލުހުންނާއި އާއްމުންނާއި ދެމެދު ކުރިމަތިލުންތަކެއް ހިނގާފައިވާއިރު، އެ ކުރިމަތިލުންތަކުގައި 24 މީހަކު ޒަޚަމްވެފައިވެއެވެ.

ސްޕެއިންގެ ސުޕްރީމް ކޯޓުން ވަނީ ކެޓަލޯނިއާގެ ވަކި ދައުލަތަކަށް ތާއީދުކުރާ 13 ލީޑަރެއްގެ މައްޗަށް ބަޣާވާތުގެ ދައުވާ ކުރާނެކަން ހާމަކޮށްފައެވެ. އެމީހުންގެ މައްޗަށް ކުށް ސާބިތުވެއްޖެނަމަ، 30 އަހަރުގެ ޖަލު ހުކުމެއް އައުން އެކަށީގެންވެއެވެ.

ކެޓަލޯނިއާގެ ގާނޫނު ހަދާ މަޖިލީހުން ވަނީ، ސަރަހައްދީ ލީޑަރަކު ކަނޑައެޅުމުގެ ބަހުސް މެދުކަނޑާލާފައެވެ. އެމަސައްކަތް މެދުކަނޑާލާފައި ވަނީ އެމަގާމަށް ވާދަކުރި ކެންޑިޑޭޓް ޖޯޑީ ޓުރޫލް ހައްޔަރު ކުރުމާއި ގުޅިގެންނެވެ.

އަންނަ މެއި މަހުގެ 22 ވަނަ ދުވަހުގެ ކުރިން ކެޓަލޯނިއާގެ އައު ރައީސަކު ކަނޑަނޭޅިއްޖެނަމަ، ގާނޫނު ހަދާ މަޖިލީހުގެ އިންތިޚާބު އަލުން ބާއްވަން ޖެހޭނެ އެވެ.

ކެޓަލޯނިއާގެ އައު ސަރުކާރު އެކުލަވާލެވެންދެން އެސަރަހައްދު އޮންނާނީ ސްޕެއިންގެ މައި ސަރުކާރުގެ ބެލުމުގެ ދަށުގައެވެ. ސްޕެއިންގެ މައި ސަރުކާރުގެ ބާރުގެ ދަށަށް އެސަރަހައްދު ގެނެސްފައިވަނީ، ކެޓަލޯނިއާގެ ސަރަހައްދީ ގާނޫނު ހަދާ މަޖިލީހުން މިދިޔަ އޮކްޓޯބަރު މަހު ކެޓަލޯނިއާގެ މިނިވަން ދައުލަތެއް އިއުލާން ކުރުމާއި ގުޅިގެން ސަރަހައްދީ ސަރުކާރު އުވާލުމަށްފަހު އެވެ.