މިއަދުވެސް ޝެއިހް އިމްރާން ޑޮކްޓަރަށް ދެއްކުމަށް މާލެގެނެސްފި
މިމަހުގެ ފަސްވަނަ ދުވަހުވެސް ކަރެކްޝަންސް އިން ވަނީ ޝެއިހް އިމްރާން މާލެ ގެނެސް ޑޮކްޓަރަށް ދައްކާފަ
އަދާލަތު ޕާޓީގެ ރައީސް ޝެއިހް އިމްރާން އަބުދުﷲ
ޓެރެރިޒަމްގެ ކުށް ސާބިތުވިކަމަށް ނިންމާ ޖަލުގައި 12 އަހަރުގެ ހުކުމެއް ތަންފީޒު ކުރައްވަމުންގެންދަވާ އަދާލަތު ޕާޓީގެ ރައީސް ޝެއިހް އިމްރާން އަބުދުﷲ މިއަދު ވެސް ޑޮކްޓަރަށް ދެއްކުމަށް މާލެގެނެސްފި ކަމަށް މައުލޫމާތު ލިބިއްޖެއެވެ.
ރާއްޖެއެމްވީއަށް އެނގިފައިވާ ގޮތުގައި އިމްރާން މާލެ ގެނެވުނީ ބުދަ ދުވަހު ހެދުނު ސްކޭންއަށް ފަހު އަނެއްކާ ވެސް ޑޮކްޓަރަށް ދެއްކުމަށެވެ. ޝެއިޚް އިމްރާނުގެ ގާނޫނީ ވަކީލު އަބުދުލް ހާދީ ވިދާޅުވީ، އިމްރާން މާލެ ގެންނަ ވާހަކަ ކަރެކްޝަންސް އިން ގުޅާފައި އެންގި ކަމަށެވެ. އެހެން ނަމަވެސް ގެނެވުނީ ކޮން ސަބަބަކާއި ހުރެކަމެއް މުޅިން ސާފު ނުވާ ކަމަށެވެ. އެހެން ނަމަވެސް ބޮޑަށް ބެލެވެނީ ޑޮކްޓަރަށް ދެއްކުމަށް ކަމަށް ހާދީ ވިދާޅުވިއެވެ.
ބުދަ ދުވަހު ސްކޭނެއް ހެދުމަށް އިމްރާން މާލެގެނެވުނު އިރު، މިމަހުގެ ފަސްވަނަ ދުވަހު ވެސް ކަރެކްޝަންސް އިން ވަނީ ޝެއިހް އިމްރާން މާލެ ގެނެސް ޑޮކްޓަރަށް ދައްކާފައެވެ.
ފެބްރުއަރީ މަހުގެ 28 ވަނަ ދުވަހު އަދާލަތު ޕާޓީން ޑޮކްޓަރުންނާ ހަވާލާދީ ބުނީ އިމްރާންގެ ލޭގައި ސޯޑިއަމްގެ ނިސްބަތް ސީރިއަސް ލެވެލެއްގައި ހުރި ކަމަށާއި ޝައިޚްގެ ހާލަތާ ގުޅިގެން ޑޮކްޓަރުން ލަފާ ދީފައިވަނީ އިތުރު ޓެސްޓްތަކެއް ހެދުމަށް ކަމަށެވެ.
މުއައްސަސާތަކުން އެކަމާ އަޅާނުލާތީ، ޝެއިހް އިމްރާން އަބްދުﷲ އާއި އޭނާގެ އާއިލާ އިން ކަމާ ބެހޭ ފަރާތްތަކުގައި އެތައް ފަހަރެއްގެ މަތިން އެ ކަންބޮޑުވުންތައް ހިއްސާކުރުމުން ވެސް އެކަށީގެންވާ ޖަވާބެއް ދީފައި ނުވާ ކަމަށް ވެސް އޭރު އަދާލަތް ޕާޓީ އިން ވަނީ ބުނެފައެވެ.
އިމްރާންގެ މައްޗަށް ޓެރަރިޒަމްގެ ކުށް ސާބިތުކޮށް، 12 އަހަރަށް ޖަލަށްލާފައި ވަނީ 2015 ވަނަ އަހަރުގެ މެއި މަހު އިދިކޮޅު ފަރާތްތަކުން މާލޭގައި ބޭއްވި މޭޑޭ މުޒާހަރާގައި ހަމަނުޖެހުން ހިންގުމަށް ހިތްވަރު ލިބޭ ގޮތަށް ވާހަކަ ދެއްކި ކަމަށް ތުހުމަތުކޮށެވެ. އިމްރާން ޖަލު ހުކުމް ތަންފީޒު ކުރައްވަމުން ގެންދަވަނީ ކ. މާފުށީ ޖަލުގައެވެ.
