ސްވައިން ފްލޫގައި އެކަކު މަރުވެ، މި ބައްޔަށް 51 މީހުން ޕޮޒިޓިވް ވުމާއެކު ރާއްޖޭގެ ހުރިހާ ސްކޫލްތައް ބަންދުކުރި ނަމަވެސް ރާއްޖެ ވަޑައިގަތުމަށް ހަމަޖެހިފައިވާ ސައޫދީ ރަސްގެފާނަށް މަރުހަބާ ދެންނެވުމަށް ބާއްވާ ނެށުމުގެ ހަރަކާތްތަކަށް ފަރިތަކުރާ ސްކޫލު ކުދިންގެ ނެށުމުގެ ޕްރެކްޓިސް ހުއްޓާ ނުލައި ކުރިއަށް ގެންދާކަން ރާއްޖެ އެމްވީއަށް އެނގިއްޖެއެވެ.

ރާއްޖެ އެމްވީއަށް އެނގިފައިވާ ގޮތުގައި ހޯމަ ދުވަހުގެ ރޭ އިއުލާންކޮށް އަންގާރަ ދުވަހުގެ ރެއިން ފެށިގެން ސްކޫލުތައް ބަންދުކޮށްފައިވީ ނަމަވެސް އަންގާރަ ދުވަހުގެރޭވެސް ވަނީ ސައޫދީ ރަސްގެފާނު ވަޑައިގަންނަވާތީ ބާއްވާ ނެށުމުގެ ހަރަކާތްތަކުގެ ޕްރެކްޓިސް ކުރިއަށް ގެންދިއުމަށް ނިންމާފައެވެ.

ޕްރެކްޓިސް އަށް ގެންދަނީ ބައެއް ސްކޫލްތަކުގެ ގްރޭޑް 6 އަދި 7 ގެ ދަރިވަރުންނެވެ. 

ދަރިވަރެއްގެ ބެލެނިވެރިއަކު ރާއްޖެ އެމްވީއަށް ބުނީ އަންގާރަ ދުވަހުގެ ރޭ ވެސް ޕްރެކްޓިހަށް ހިރިޔާ ސްކޫލަށް ގެންދިއުމަށް އަންގާފައިވާ ކަމަށެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އަންގާރަ ދުވަހުގެ ރޭ 8:00އިން 10:00 އަށް އެނެށުމުގެ ޕްރެކްޓިސް ބޭއްވުމަށް ވަނީ ހަމަޖެހިފައެވެ. އެހެން ސްކޫލްތަކުންވެސް ބައިވެރިވާ މި ނެށުމުގައި 100 އެއްހާ ކުދިން ބައިވެރިވާ ކަމުގެ މައުލޫމާތުވެސް ރާއްޖެ އެމްވީއަށް ވަނީ ލިބިފައެވެ.

ހެލްތް ޕްރޮޓެކްޝަން އެޖެންސީން ބުނީ، ސްކޫލްތައް ބަންދުކުރަން ލަފާދިނީ ބަލި އިތުރަށް ފެތުރުން ކޮންޓްރޯލްކުރުމުގެ ގޮތުން ރައްކާތެރިކުރުމަށް އެޅި ފިޔަވަޅެއްގެ ގޮތުން ކަމަށެވެ. އެޗްޕީއޭއިން އެގޮތަށް ލަފާދިނުމާއި ގުޅިގެން، ނޫސްވެރިންނަށް މައުލޫމާތު ދެއްވަމުން އެޑިއުކޭޝަން މިނިސްޓްރީގެ އޮފިޝަލް ވިދާޅުވީ ސުކޫލްތައް ބަންދުކުރުމަށް ނިންމާފައިވާ ކަމަށެވެ. އަދި ކުރިއަށް އޮތް ތިން ދުވަހު ސްކޫލްތައް ބަންދުވާނެކަމަށް އޮފިޝަލް ވިދާޅުވި އެވެ. ބަންދުކުރަން ނިންމާފައިވަނީ ޕްރީ ސްކޫލުން ފެށިގެން ގްރޭޑް 12 އާއި ހަމައަށް ކިޔަވައިދޭ ހުރިހާ ސްކޫލްތަކެއް ކަމަށްވެސް އޮފިޝަލް ވިދާޅުވި އެވެ. އޭނާ ވިދާޅުވީ ކުރިއަށް އޮތް މިޑްޓާމް ބަންދުނިމޭއިރު، ވައިރަސް ފެތުރޭ މިންވަރަށް ބެލުމަށްފަހު ނިންމުންތައް ނިންމާނެކަމަށެވެ.

މިރޯގާއާއި ގުޅިގެން ކުޅިވަރު އެސޯސިއޭޝަންތަކުން ބާއްވާ އިންޓަރ ސްކޫލް ހުރިހާ ކުޅިވަރު މުބާރާތްތަކެއް ވަނީ މުއްދަތެއް ނެތްގޮތައް ފަސްކޮށްފައެވެ. އަދި ޤައުމީ ޤުރުއާން މުބާރާތުގެ އޯޕަނިންގވެސް ވަނީ ފަސްކޮށްފައެވެ. މީގެ އިތުރުން އަންގާރަ ދުވަހުގެރޭ ބޭއްވުމަށް ހަމަޖެހިފައިވާ 12 ވަނަ ހެވިކަމުގެ ނިންމުމުގެ ރަސްމިއްޔާތުވެސް ވަނީ ކެންސަލް ކޮށްފައެވެ.