ވެރިކަން ކުރުން ހުއްޓުވޭނެ ހަމައެކަނި ގޮތަކީ މަރުވުން: ސައުދީ ވަލީއަހުދު

ސައުދީ އަރަބިއްޔާގައި އެމަނިކުފާނު ވެރިކަން ކުރުން ހުއްޓުވޭނެ ހަމައެކަނި ގޮތަކީ މަރުވުން ކަމަށް ވަލީއަހުދު މުހައްމަދު ބިން ސަލްމާން ވިދާޅުވެއްޖެއެވެ.

އެމެރިކާއަށް ކުރައްވަމުން ގެންދަވާ ދަތުރުފުޅުގައި ސީބީއެސްގެ ސިކްސްޓީ މިނިޓް ޕްރޮގްރާމަށް އާދީއްތަ ދުވަހު ދެއްވި ޚާއްސަ އިންޓަވިއުއެއްގައި ވަލީ އަހުދު ސަލްމާން ވިދާޅުވީ ދުނިޔޭގެ ހުންނާނެ ދުވަހެއް ހަމައެކަނި އެނގޭނެ ފަރާތަކީ ހެއްދެވި ފަރާތްކަމަށާއި، އާންމު ހިނގުމުގައި ކަންކަން ގޮސްފިނަމަ އެއީ އުއްމީދު އޮތް ކަމެއް ކަމަށެވެ.

އެކަން ހުއްޓުވޭނެ ގޮތަކީ ކޮބައިތޯ ސީބީއެސްގެ ޕްރެޒެންޓަރ ނޯރާ އޯ ޑަނެލް އެހުމުން ވަލީއަހުދު މުހައްމަދު ވިދާޅުވީ "ހަމައެކަނި މަރު" ކަމަށެވެ.

ސީބީއެސްގެ 60 މިނިޓްސްއަށް ދެއްވި މި އިންޓަރވިއުއަކީ ވަލީއަހުދުކަމަށް މުހައްމަދު ވަޑައިގެންނެވިފަހުން އެމެރިކާގެ ޓީވީ ޗެނަލަކަށްދެއްވި ފުރަތަމަ އިންޓަވިއުއެވެ.

ސައުދީއަށް އިންގިލާބީ ބަދަލުތަކެއް ގެންނަވަމުން ވަޑައިގަންނަވާ ވަލީއަހުދު މުހައްމަދަކީ އެޤައުމުގެ މިހާރުގެ ލީޑަރުގެ ގޮތުގައި ވަނީ ސިފަކޮށްފައެވެ.

ސައުދީގައި އެންޓި ކޮރަޕްޝަން ޔުނިޓްތަކެއް އުފެއްދުމަށް ނިންމާފައިވާކަމަށް މިމަހުގެ ތެރޭގައި އިއުލާނުކޮށްފައިވާއިރު މިދިޔަ ނޮވެމްބަރު މަހު ކުރީކޮޅު ވަނީ ކޮރަޕްޝަނުގެ ތުހުމަތުގައި އެ ގައުމުގެ މަޝްހޫރު މަހުޖަނުންނާއި، ޝާހީ އާއިލާގެ މެމްބަރުންނާއި އަދި މިނިސްޓަރުން ވެސް ހައްޔަރުކޮށްފައެވެ. ކޮރަޕްޝަނާ ދެކޮޅަށް ސައުދީން ފެށި އޮޕަރޭޝަން ފެށީ ކޮރަޕްޝަންގެ މައްސަލަތަކާ ގުޅިގެން ބޮޑެތި ބާރުތަކަކާ އެކު މިދިޔަ ނޮވެމްބަރު މިކޮމިޓީގެ ޗެއަރމަނަކަށް އައްޔަން ކޮށްފައި ވަނީ ވަލީއަހުދު މުހައްމަދު ބިން ސަލްމާނެވެ.