ފެބްރުއަރީ މަހުގެ 24 ވަނަ ދުވަހު މަރުވި އިންޑިއާގެ މަޝްހޫރު ފިލްމީ ތަރި ސްރީދޭވީގެ ބަޔޯޕިކްއެއް ހެދުމަށް ނިންމާފައިވާކަން ޑައިރެކްޓަރ ހަންސަލް މެހެތާ ހާމަކޮށްފިއެވެ.

މި ފިލްމުގައި ސްރީދޭވީގެ ބައި ކުޅުވަން ބޭނުންވަނީ ބޮލީވުޑްގެ ތަރި ވިދްޔާ ބާލަން ލައްވައި ކަމަށާއި، އޭނާއާއި އެވާހަކަ ދައްކަމުންދާކަމަށް ހަންސަލް ވަނީ ބުނެފައެވެ.

ހަންސަލް ބުނީ ސްރީދޭވީ މަރުވީ އޭނާއާއި އެކު ފިލްމެއްގެ މަސައްކަތް ކުރުމަށް ވާހަކަ ދެކެވެމުން ދަނިކޮށް ކަމަށެވެ. ހަންސަލް ބުނީ އޭނާއަށް ސްރީދޭވީއާއިއެކު މަސައްކަތް ނުކުރެވުނު ކަމުގައިވީނަމަވެސް އޭނާގެ ހަޔާތުގެ މައްޗަށް ފިލްމެއް ހަދާނެ ކަމަށެވެ.

ސްރީދޭވީގެ ހަޔާތުގެ މައްޗަށް ފިލްމެއް ހަދަން ހަންސަލް ނިންމާފައިވާއިރު ސްރީދޭވީގެ ހަޔާތުގެ މައްޗަށް ޑޮކިއުމެންޓްރީއެއް ގެނެސްދިނުމަށް އޭނާގެ ފިރިމީހާ ބޯނީ ކަޕޫރު ވަނީ ނިންމާފައެވެ. ޚަބަރުތައް ބުނާ ގޮތުގައި މި ޑޮކިއުމެންޓްރީގެ މަސައްކަތް ޑައިރެކްޓަރ ޝޭކަރް ކަޕޫރު ވަރަށް އަވަހަށް ކުރާނެއެވެ.

ސްރީދޭވީގެ ޕޯސްޓްމޯޓަމް ރިޕޯޓްތައް އާންމު ކޮށްފައިވާއިރު އެ ރިޕޯޓްތަކުގައި ބުނެފައިވަނީ ސްރީދޭވީ މަރުވީ ގެނބިގެން ކަމަށެވެ. ސްރީދޭވީ އެންމެ ފުރަތަމަ ފިލްމު ކުޅެން ފެށީ އުމުރުން އެންމެ ހަތަރު އަހަރުގައެވެ. މަރުވިއިރު ސްރީދޭވީގެ އުމުރުން 54 އަހަރެވެ. އޭނާ މަރުވިއިރު ކައިވެނިކޮށްގެން އުޅުނީ ފިލްމް ޕްރޮޑިއުސަރ ބޮނީ ކަޕޫރާއެވެ. ބޮނީ އާއި ސްރީދޭވީއަށް ދެކުދިން ލިބިފައިވެއެވެ.