ސްރީދޭވީގެ މަރާއި ގުޅިގެން ޕަރީ އެޅުވުން ފަސްކޮށްފި

މަޝްހޫރު ތަރި ސްރީދޭވީގެ މަރާ ގުޅިގެން މިއަދު ސިނަމާތަކަށް އަންނާނެ ކަމަށް ކަނޑައަޅާފައިވާ ބޮލީވުޑްގެ ފިލްމު ޕަރީ އެޅުވުން ފަސްކޮށްފިއެވެ.

ޕަރީ އެޅުވުން ފަސްކޮށްފައިވަނީ މިމަހުގެ 2 ވަނަ ދުވަސްކަމަށްވާ އަންނަ ހުކުރު ދުވަހަށެވެ.

ޕަރީއަކީ ބޮލީވުޑްގެ ބިރުވެރި ފިލްމެކެވެ. މި ފިލްމުގެ ޝޫޓިން ފަށާފައިވަނީ މިދިޔަ އަހަރުގެ ޖޫން މަހުގައެވެ. މިއީ އަނުޝްކާއާ އޭނާގެ ބޭބެ ކަރްނޭޝް ޝަރުމާގެ ޕްރޮޑަކްޝަން ހައުސް ކަމަށްވާ ކްލީން ސްލޭޓް ފިލްމުން އޭނާ ކުޅޭ ތިންވަނަ ފިލްމެވެ. މި ފިލްމުގެ ލީޑް ރޯލުން ފެނިގެންދާނީ އަނުޝްކާއެވެ. އަދި މިއީ އަނުޝްކާގެ ތިންވަނަ ޕްރޮޑަކްޝަން ވެސް މެއެވެ.

މި ފިލްމުގައި އަނުޝްކާގެ އިތުރުން ފެނިގެން ދަނީ ޕަރަމްބްރަތާ ޗަޓެރްޖީ އާއި ރާޖަތު ކަޕޫރު އަދި ރިތަބާރީ ޗަކްރަބޯޓީ އެވެ. މި ފިލްމުގެ ޕްރޮޑިއުސަރަކީ ޕްރޯސިތު ރޯއިއެވެ.

ޕަރީގެ ކޯ ފްރޮޑިއުސާ ޕްރޭނާ އަރޯރާ ބުނެފައިވަނީ ޕަރީ އެޅުވުން ފަސްކުރީ ސްރީޯދޭވީގެ މަރާއި ގުޅިގެންކަމަށާއި އޭނާއަށް ކުރާ އިހްތިރާމް އަދާކުރުމުގެ ސަބަބުން ކަމަށެވެ. ސްރީދޭވީ މަރުވެފައިވަނީ މިމަހުގެ 24 ވަނަ ދުވަހުގައެވެ.