ސްރީދޭވީގެ ޖަނާޒާއަށް އޭނާގެ ހަށިގަނޑު މުމްބާއީއަށް މިއަދު ގެންދާނެ

މިދިޔަ ހޮނިހިރު ދުވަހު މަރުވި މަޝްހޫރު އެކްޓްރެސް ސްރީދޭވީ ކަޕޫރު މިއަދު މުމްބާއީއަށް ގެންދާނެއެވެ.

އިންޑިއާގެ ނޫސްތައް ބުނާގޮތުގައި އޭނާ މިއަދު މެންދުރު ފަހު 1:30 ގައި މުމްބާއީއަށް ގެންދާނީ ޕްރައިވެޓް ޖެޓެއްގައެވެ.

ސްރީދޭވީގެ އާއިލާއިން ބުނެފައިވަނީ ސްރީދޭވީ މަރުވީ އާއިލާ މީހެއްގެ ކައިވެންޏަށް ދުބާއީއަށް ގޮސް އުޅެނިކޮށް ޖެހުނު ކުއްލި ހާޓްއެޓޭކެއްގެ ސަބަބުން ކަމަށެވެ. ހޮނިހިރު ދުވަހުގެ ރޭ ސްރީދޭވީ މަރުވެފައިވަނީ ހާޓް އެޓޭކެއް ޖެހިގެން ދުބާއީގައެވެ. މަރުވިއިރު އުމުރުން 54 އަހަރެވެ. މަރުވިއިރު ކައިވެނިކޮށްގެން އުޅުނީ ފިލްމް ޕްރޮޑިއުސަރ ބޮނީ ކަޕޫރާއެވެ. ބޮނީ އާއި ސްރީދޭވީއަށް ދެކުދިން ލިބިފައިވެއެވެ.

ބޮނީ އާއި ކައިވެނި ކުރުމުގެ ކުރިން ސްރީދޭވީ ވަނީ ބޮލީވުޑްގެ ލެޖެންޑް މިތުން ޗަކްރަބޮތީ އާއިވެސް ކައިވެނިކޮށްފައެވެ. އެ ކައިވެންޏަށް ކުއްޖަކު ލިބިފައެއް ނުވެއެވެ.

ސްރީދޭވީގެ ކުއްލި މަރާއި ގުޅިގެން ބޮލީވުޑްގެ ފަންނާނުންނާއި، އިންޑިއާގެ ރައްޔިތުން ހިމެނޭގޮތަށް ގިނަ ބަޔަކު ހިތާމަ ފާޅުކުރަމުންދާއިރު، އިންޑިއާގެ ބޮޑުވަޒީރު، ނަރެންދްރަ މޯދީވެސް ވަނީ ސްރީދޭވީގެ ކުއްލި މަރާއި ގުޅިގެން ހިތާމަ ފާޅުކުރައްވާފައެވެ. މޯދީ ވިދާޅުވީ ސްރީދޭވީގެ ދިގު ފިލްމީ ކެރިއަރުގައި ވަރަށް މޮޅު ޕާފޯމަންސްތަކެއް ދައްކާފައިވާ ކަމަށެވެ.

ސްރީދޭވީ އެންމެ ފުރަތަމަ ފިލްމު ކުޅެން ފެށީ އުމުރުން އެންމެ ހަތަރު އަހަރުގަ އެވެ. އޭނާ ވަނީ އިންޑިއާގެ އެކި ފިލްމުތަކުން ފެނިގެން ގޮސްފައެވެ. އޭނާ ކުޅުނު ހިންދީ، ތަމަޅަ އަދި ތެލުގޫ ފަދަ ބަސްތަކުގެ ފިލްމުގެ އަދަދު 300 އަށް ވުރެ ގިނަ އެވެ. ސްރީދޭވީގެ އެންމެ ފަހު ފިލްމަކީ މިދިޔަ އަހަރު ނުކުތް "މޮމް" އެވެ.