ވިދްޔާ ބާލަންގެ އައު ފިލްމު ރިލީޒް ނުކުރަނީސް 5 ކްރޯރްގެ ފައިދާއެއް

ވިދްޔާ ބާލަންގެ ތުމާރީ ސުލޫ އަކީ މި މަހު ނެރެން ހަމަޖެހިފައިވާ ހިންދީ ފިލްމުތަކުގެ ތެރެއިން އެންމެ އުއްމީދީ އެއް ފިލްމެވެ. އެ އުއްމީދު އެހެން އޮތްއިރު، އެކަން ހަޤީޤަތަކަށް ވުމުގެ ކުލަތައް މިހާރުވެސް ވަނީ ފެންނަން ފަށާފައެވެ. ފިލްމު ރިލީޒް ކުރުމުގެ ކުރިން މި ފިލްމަށް މިހާރު ވަނީ ފައިދާ ވާން ފަށާފައެވެ.

މި ފިލްމަކީ ޓާގެޓެޑް އޯޑިއެންސް ނުވަތަ ވަކި ވައްތަރެއްގެ އޯޑިއެންސަށް ކަމުދާގޮތަށް ހަދާފައިވާ ފިލްމެއް ކަމުން ފިލްމު ހަދާފައިވަނީ ކުޑަ ބަޖެޓަކުންނެވެ. އެގޮތުން އެންމެ 17 ކްރޯރް ޚަރަދުކޮށްގެން ހަދާފައިވާ މި ފިލްމު ރިލިޒް ނުކުރަނީސް މިހާރުވެސް މި ފިލްމަށް ވަނީ ޖުލްލަ 22 ކްރޯރް ރުޕީޒް ލިބިފައެވެ. މީގެ ތެރޭގައި ސާފު ފައިދާގެ ގޮތުގައި ހިމެނޭ 5 ކްރޯރް ރުޕީޒްވެސް ހިމެނެއެވެ.

މި ފިލްމަށް ފައިދާ ވެފައިވާ ދާއިރާތަކަށް ބަލާއިރު، ތިއެޓްރިކަލް ރައިޓްސް ވިއްކައިގެން މި ފިލްމަށް ވަނީ 13 ކްރޯރް ރުޕީޒް ލިބިފައެވެ. އަދި އޮވަރސީޒް ރައިޓްސްގެ ގޮތުގައި 2 ކްރޯރް، އަދި ސެޓްލައިޓް ރައިޓްސްގެ ގޮތުގައި 5 ކްރޯރް ލިބިފައިވާއިރު، ޕްރޮޑަކްޓް ޕްލޭސްމަންޓާއި އެހެނިހެން ގޮތްގޮތުން މި ފިލްމަށް އިތުރު 2 ކްރޯރް ރުޕީޒްގެ އާމްދަނީއެއް ލިބިފައިވެއެވެ.

މި ފިލްމުގައި ދައްކައިދެނީ އަންހެން ރޭޑިއޯ ޖޮކީއެއްގެ ދިރިއުޅުމުގައި ހިނގާ ކަންތައްތަކެކެވެ. ރިޕޯޓްތައް ބުނާ ގޮތުގައި މި ފިލްމު ވެގެންދާނީ މިހާތަނަށް ވިދްޔާގެ އެންމެ މޮޅު އެކްޓިންގއެއް ފެނިގެންދާ އެއް ފިލްމަށެވެ.

މި ފިލްމު ރިލީޒް ކުރުމަށް ހަމަޖެހިފައިވަނީ މި މަހުގެ 17 ވާ ހުކުރު ދުވަހެވެ.