ޝާހާ އެކު ފިލްމެއް ކުޅޭކަށް ހުށަހެޅުމެއް ނުލިބޭ: ވިދްޔާ
15 ނޮވެމްބަރު 2017 | ބުދަ 12:31ވިދްޔާ ފިލްމު ކުޅެފައި ވަނީ މަޝްހޫރު މަދު ތަރިންތަކަކާ އެކު
ވިދްޔާ ބާލަން: އޭނާގެ ފިލްމުތަކަށް ކްރިޓިކުންގެ ފަރާތުން ލިބިފައި ވަނީ ރަނގަޅު ތަރުޙީބެއް
ޝާހު ރުކް ޚާނާ އެކު ފިލްމެއް ކުޅެން އެއްވެސް ފަރާތަކުން ހުށަނާޅާ ކަމަށް ބޮލީވުޑްގެ ކުޅަދާނަ އެކްޓްރެސް ވިދްޔާ ބާލަން ބުނެފިއެވެ.
ބޮލީވުޑްގެ ޚަބަރުތައް ގެނެސްދޭ "ބޮލިވުޑްލައިފް" އަށް ދިން އިންޓަރވިއުއެއްގައި ވިދްޔާ ބުނީ، ބޮޑެތި، މަޝްޙޫރު އެކްޓަރުންނާ އެކު ފިލްމު ކުޅުމަށް އޭނާއަށް މާގިނަ ހުށަހެޅުންތަކެއް ނުލިބޭ ކަމަށާއި، ނަމަވެސް އޭނާ ކުޅޭ ކޮންމެ ފިލްމެއް ވެސް ކުޅެނީ ވަރަށް ހިތްހަމަޖެހިގެން ކަމަށެވެ.
ވިދްޔާ ބުނީ، ފިލްމަކަށް އާނ ބަސް ބުނުމުގައި އޭނާ ބަލަނީ ފިލްމުގެ ސްކްރިޕްޓްގެ ކޮލިޓީއަށް ކަމަށާއި، ބޮޑެތި، މަޝްޙޫރު އެކްޓަރުންނާ އެކު ވެސް ފިލްމެއް ކުޅޭނީ އެ ފިލްމެއްގެ ސްކްރިޕްޓް ކަމުދާ ނަމަ ކަމަށެވެ.
ވިދްޔާ ބުނީ މަޝްޙޫރު އެކްޓަރުންނާ އެކު މަސައްކަތް ކުރަން ބޭނުންވާ ކަމަށާއި، ނަމަވެސް ކޮންމެ ކޮންމެ ފިލްމެއްގައި ބައިވެރިވާން ބޭނުން ނުވާ ކަމަށެވެ.
މަޝްޙޫރު އެކްޓަރުންގެ ތެރެއިން އަކްޝޭ ކުމާރް، އަބީޝެކް ބައްޗަން، ސައިފް އަލީ ޚާން އަދި އިމްރާން ހާޝިމީ ފިޔަވައި އިތުރު އެކްޓަރަކާ އެކު ވިދްޔާ މިހާތަނަށް ފިލްމެއް ކުޅެފައި ނުވި ނަމަވެސް، އޭނާ މިހާތަނަށް ކުޅެފައިވާ ކޮންމެ ފިލްމަކީ ވެސް ކާމިޔާބު، މޮޅު ފިލްމެއްގެ ގޮތުގައި ފާޑުކިޔާ ފަރާތްތަކުން ވަނީ ފާހަގަ ކޮށްފައެވެ. މީގެ ތެރޭގައި ކަހާނީ، ޑަރޓީ ޕިކްޗަރ އަދި ނޯ ވަން ކިލްޑް ޖެސިކާ ފަދަ ފިލްމުތައް ހިމެނެއެވެ.
