ފަލަސްތީނުގެ ބޮޑުވަޒީރު ރަމީ ހަމްދަﷲ ޣައްޒާއަށް ވަޑައިގަތުމުން އެމަނިކުފާނުގެ ވަފުދަށް އަމާޒުކޮށް އެއްޗެއް ގޮއްވާލާފައިވަނީ އިސްރާއީލުން ކަމަށް ކަނޑަނާޅާ ކަމަށާއި އެކަން ތަހުގީގުކުރުމަށް ހަމާސް ޖަމާއަތުން ގޮވާލައިފިއެވެ.
ހަމާސްގެ ކޮންޓްރޯލް އޮންނަ ޣައްޒާގައި ޕަބްލިކް ވޯކްސް ފެސިލިޓީއެއް ހުޅުވުމަށް ރަމީ ހަމްދަﷲ އަންގާރަ ދުވަހު ކުރެއްވި ޒިޔާރަތުގައި އެމަނިކުފާނަށް އަމާޒުކޮށް، ދިން ހަމަލާގައި އެތައް ސެކިއުރިޓީ ގާޑުންނެއް ޒަޚަމްވެފައިވާއިރު އެ މަނިކުފާނުވަނީ ޒަޚަމްވެ ވަޑައިނުގެން ސަލާމަތްވެ ވަޑައިގެންފައެވެ.
އަލް ޖަޒީރާއިން ރިޕޯޓްކޮށްފައިވާ ގޮތުގައި އެ ގޮވުން ގޮވާފައިވަނީ ހަމަދަﷲ އާއިއެކުގައި ދަތުރުކުރި ވެހިކަލްތައް އިސްރާއީލުން ކޮންޓްރޯލްކުރާ އަރްޒް ޗެކްޕޮއިންޓް ހުރަސްކުރުމާއިއެކުއެވެ.
ބައެއް މަސްދަރުތަކާއި ހަވާލާދީ އަލްޖަޒީރާއިން ބުނެފައިވަނީ ހަމްދަﷲ އާއި ހަމާސްގެ ސިޔާސީ އިސް ލީޑަރު، އިސްމާއިލް ހަނިއްޔާ އަންގާރަ ދުވަހުގެ ފަހުގެ ވަގުތެއްގައި ފޯނުން ގުޅުއްވައި މަޝްވަރާ ކުރައްވާފައިވާ ކަމަށާއި، އަދި ހަމަލާގެ ފައިދާ އޮތް ފަރާތަކީ އިސްރާއީލް ކަމަށް ފެންނައިރު ހަމަލާދީފައިވަނީ އިސްރާއީލުންކަމަށް ދެބޭފުޅުންވެސް އެއްބަސްވެ ވަޑައިގަންނަވާކަމަށެވެ.
ފަލަސްތީނުގެ ސަރުކާރުގެ ތަރުޖަމާނު ޔޫސުފު އަލް މަހްމޫދު ވަނީ އެ ދެބޭފުޅުން ފޯނުން ގުޅުއްވައި މަޝްވަރާކުރެއްވިކަމަށް ބުނާ ރިޕޯޓްތައް ފަލަސްތީނުގެ ނޫސް އޭޖެންސީ، ވަފާ މެދުވެރިކޮށް ދޮގު ކުރައްވާފައެވެ.
ހަމާސްއިންވަނީ އެ ހަމަލާގައި އެ ޖަމާއަތުގެ އެއްވެސް ބައިވެރިވުމެއް ނޯންނާނެ ކަމަށާއި އެ ޖަމާއަތުން އެ ކަމުގެ "ތަހުގީގެއްކޮށް ހަމަލާގެ ފަހަތުގައިވާ ފަރާތްތައް އިންސާފުގެ ކުރިމައްޗަށް ގެންނާނެ" ކަމަށެވެ.
މި ތަހުގީގު ހިންގުމުގެ ޒިންމާ ހަވާލުކުރައްވާފައިވަނީ ހަމާސްގެ ސަލާމަތީ ކަންކަމާއިބެހޭ އިސްވެރިޔާ ތައުފީޤް އަބޫ ނައީމް އާއެވެ.
ފަލަސްތީނުގެ ވާދަވެރި ސިޔާސީ ދެ ޕާޓީ ކަމަށްވާ ހަމާސް ޖަމާއަތާއި ފަތަހް ޖަމާއަތުން 2017 ވަނަ އަހަރުގެ އޮކްޓޯބަރު މަހުވަނީ 10 ވަރަކަށް އަހަރުވީ ޚިލާފްތައް ނައްތާލައި ޣައްޒާއާއި ހުޅަނގު އައްސޭރީގައި އެއް ސަރުކާރެއް ބޭއްވުމަށް އެއްބަސްވުމަކަށް ގޮސްފައެވެ.
އޭގެ ކުރިން ހަމާސް ޖަމާއަތަކީ ހުޅަނގު އައްސޭރީގެ ވެރިކަންކުރާ ޕާޓީ ކަމަށްވާއިރު ޣައްޒާގެ ކޮންޓްރޯލް އޮންނަނީ ހަމާސް ޖަމާއަތުގެ އަތްމަތީގައެވެ.
