ގުޅިފައިވާ ޕާޓީތަކުން އދ. ގެ ހައި ކޮމިޝަނަރ ފޯރ ހިއުމަން ރައިޓްސްއާ ބައްދަލުކޮށްފި
13 މާރިޗު 2018 | އަންގާރަ 17:11ގުޅިފައިވާ ޕާޓީތަކުގެ ފަރާތުން ބައިވެރިވެވަޑައިގެންނެވީ ރައީސް ނަޝީދުގެ ސަރުކާރުގެ ފޮރިން މިނިސްޓަރު އަހުމަދު ނަސީމް
ޕްރިންސް ޒައިދު (ކ) އަދި ކުރީގެ ފޮރިން މިނިސްޓަރު ނަސީމް (ވ)
ގުޅިފައިވާ ޕާޓީތަކުން އދ. ގެ ހިއުމަން ރައިޓްސް ކޮމިޝަނާ ޕްރިންސް ޒައިދު ރައާދު އަލް ޙުސައިންއާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި ގުޅިފައިވާ ޕާޓީތަކުގެ ފަރާތުން ބައިވެރިވެވަޑައިގެންނެވީ ރައީސް ނަޝީދުގެ ސަރުކާރުގެ ފޮރިން މިނިސްޓަރު އަހުމަދު ނަސީމެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރައްވާފައި ވަނީ ރާއްޖެއަށް މިހާރު ކުރިމަތިވެފައިވާ ސިޔާސީ ހަލަބޮލި ކަމަށް ހައްލެއް ހޯދުމަށް ކަމަށް ގުޅިފައިވާ ސިޔާސީ ޕާޓީތަކުގެ ލީގަލް އެޑްވައިޒަރު ބެން އެމާސަން ކުރެއްވި ޓްވީޓެއްގައި ވެއެވެ.
ޕްރިންސް ޒައިދާ ގުޅިފައިވާ ޕާޓީތަކުން ބައްދަލުކުރައްވާފައިވާއިރު އެމަނިކުފާނު ވަނީ ސަރުކާރުން މިހާރު އަޅާފައިވާ ފިޔަވަޅުތައް އުވާލުމަށް ވެސް މީގެ ކުރިން އެދިވަޑައިގެންފައެވެ. ހަމައެހެންމެ ސިޔާސީ ލީޑަރުންތަކާ އެކު ނުވަ މީހަކު މިނިވަންކުރަން ސުޕްރީމް ކޯޓުން އަމުރު ނެރުނު ފަހުން ކުއްލި ނުރައްކަލުގެ ހާލަތު އިއުލާންކޮށް، ގާނޫނު އަސާސީން ކަށަވަރުކޮށްދީފައިވާ އަސާސީ ހައްގުތަކެއް ނިގުޅައިގެންފައިވާ ކަމަށް ވެސް ޒައިދު މީގެ ކުރިން ނެރުއްވި ބަޔާނެއްގައި ވިދާޅުވެފައި ވެއެވެ.
ސަރުކާރާ އެކު އިދިކޮޅު ފަރާތްތަކުން މަޝްވަރާކުރާނީ ހަމައެކަނި އދ. އިން މެދުވެރިއެއްގެ ރޯލު އަދާކުރާ މަޝްވަރާއެއްގައި ކަމަށް އެ ފަރާތްތަކުން ވަނީ ބުނެފައެވެ.
