އޮސްކާގެ ގޭމް އިނގޭ، ތަފާތު ދައްކާނީ ކުޅުންތެރިން: ސަންޓޯޝް
13 މާރިޗު 2018 | އަންގާރަ 07:56މިއީ އައިޒޮލް އެފްސީ މުބާރާތުގައި ކުޅޭ ފުރަތަމަ މެޗު
އައިޒޮލް އެފްސީގެ ކޯޗު ސަންޓޯޝް ކެޝަޕް
ނިއު ރޭޑިއަންޓް ސްޕޯޓްސް ކްލަބްގެ ކޯޗު އޮސްކާ ބްރޫޒޯންގެ ގޭމް ޕްލޭން އިނގޭ ކަމަށާއި އެހެން ނަމަވެސް ތަފާތު ދައްކާނީ ކުޅުންތެރިން ކަމަށް އައިޒޮލް އެފްސީގެ ކޯޗު ސަންޓޯޝް ކެޝަޕް ބުނެފިއެވެ.
ބުދަ ދުވަހުގެ ހަވީރު އޭއެފްސީ ކަޕްގެ ގްރޫޕް ސްޓޭޖުގައި ނިއުއާ ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސަންޓޯޝް ބުނީ އޮސްކާއަކީ އިންޑިއާގައި ގިނަ އަހަރުތަކެއް ވަންދެން މަސައްކަތްކުރި ކޯޗެއް ކަމަށާއި އޭނާއާއެކު ބައެއް ކޯޗިން ޓްރެއިނިން ޕްރޮގްރާމްގައި ވެސް ބައިވެރިވި ކަމަށެވެ. އެހެންކަމުން ދެ މީހުންނަށް ވެސް އެކަކު އަނެކަކު ވަރަށް ރަނގަޅަށް އެނގޭ ކަމަށާއި އޮސްކާގެ ގޭމް ވަރަށް ރަނގަޅަށް ދަންނަ ކަމަށް ވެސް ސަންޓޯޝް ބުނެފައިވެއެވެ. އޭނާ ބުނީ ތަފާތު ދައްކާނީ އަބަދުވެސް ކުޅުންތެރިން ކަމަށާއި އޮސްކާއަށް އޮތް އެންމެ ބޮޑު ފައިދާއަކީ ނިއުއާއެކު އޭނާ ގިނަ ދުވަހު މަސައްކަތްކޮށްފައިވުން ކަމަށް ވެސް ސަންޓޯޝް ބުނެފައިވެއެވެ.
މިއީ އޭއެފްސީ ކަޕްގައި އައިޒޮލް ކުޅޭ ފުރަތަމަ މެޗަށްވާއިރު މިއީ ނިއުގެ ދެވަނަ މެޗެވެ. ފުރަތަމަ މެޗުގައި ބެންގަލޫރު އެފްސީއާ ދެކޮޅަށް އައިޒޮލް ނުކުންނަން އޮތް ނަމަވެސް އިންޑިއަން ސުޕާ ލީގުގެ ސެމީ ފައިނަލުގެ ސަބަބުން އެ މެޗު ފަސްކުރެވުނެވެ. އެކަމާއި ގުޅޭގޮތުން ވާހަކަ ދައްކަމުން ސަންޓޯޝް ބުނީ އައިޒޮލްގެ ކޯޗެއްގެ ގޮތުގައި އޭނާއަށް ތައްޔާރުވާން ލިބުނީ މަހެއްހާ ދުވަސް ކަމަށާއި މެޗު ލަސްވުމަކީ ވެސް މި މެޗަށް ތައްޔާރުވުމަށް ލިބުނު އިތުރު ބާރެއް ކަމަށެވެ. ކުޑަ ދުވަސްކޮޅެއްގެ ތެރޭގައި އޭނާގެ އިރުޝާދުތަކަށް ކުޅުންތެރިން ވެސް ހޭނިފައިވާ ކަމަށާއި އެއީ ކުރަން ވަރަށް އުނދަގޫ ކަމެއް ކަމަށް ވެސް ސަންޓޯޝް ބުނެފައިވެއެވެ.
މިދިޔަ ސީޒަނުގައި އިންޑިއާގެ ޗެމްޕިއަންކަން ހޯދި އައިޒޮލް އެފްސީ އަދި ނިއު ބައްދަލުކުރާ މެޗު ފަށާނީ މާދަމާ ހަވީރު 16:00 ގައެވެ.
