ތިނަދޫގައި ތަންފީޒު ޖަގަހަ ހުޅުވައިފި
9 މާރިޗު 2018 | ހުކުރު 12:51ސުޕްރީމް ކޯޓުގެ އަމުރު ތަންފީޒުކުރުމަށް ބާރުއެޅުމަށް އެކި ހަރަކާތްތައް ކުރިއަށްގެންދާނެ
ތިނަދޫ ތަންފީޒު ޖަގަހަ ހުޅުވުން
ގުޅިފައިވާ ޕާޓީތަކުގެ އިސްލާހީ މަސައްކަތުގެ ތެރެއިން އެކިއެކި ހަރަކާތްތައް ހިންގުމަށް ގދ. ތިނަދޫގައި ޚާއްސަ ޖަގަހައެއް ހުޅުވައިފިއެވެ.
"ތަންފީޒު ޖަގަހަ" އިގެ ނަމުގައި ހުކުރު ދުވަހުގެ ހަވީރު މި ޖަހަގަ ހުޅުވައިދެއްވީ ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެންބަރު މުޙައްމަދު ނާޒިމްއެވެ.
ޖަގަހަ ހުޅުއްވައިދެއްވުމަށް ފަހު ނާޒިމް ވިދާޅުވީ، މި ޖަގަހައިގެ މައި މަސައްކަތަކަށް ވެގެންދާނީ ފެބްރުއަރީ މަހުގެ ފުރަތަމަ ދުވަހު ސުޕްރީމް ކޯޓުން ނެރުނު އަމުރު ތަންފީޒު ކުރުމަށް ބާރުއެޅުން ކަމަށެވެ. ތިނަދޫއަކީ އެމްޑީޕީއަށް ބޮޑު ތާޢީދެއް އޮންނަ ރަށަކަށްވާއިރު، ނާޒިމް ވިދާޅުވި ގޮތުގައި ތަންފީޒު ޖަގަހައިގެ މަސައްކަތްތައް މައިގަނޑު ގޮތެއްގައި ކުރިއަށްގެންދާނީ އެމްޑީޕީން އިސްނަގައިގެން، ގުޅިފައިވާ އެހެން ޕާޓީތަކާއިއެކުއެވެ.
ސުޕްރީމް ކޯޓުގެ ފުރިހަމަ ބެންޗުން މި އަހަރުގެ ފެބްރުއަރީ މަހުގެ ފުރަތަމަ ދުވަހު ނެރުނު އަމުރު ތަންފީޒު ކުރުމަށް ބާރުއެޅުމަށް ތިނަދޫގައި ޖަގަހައެއް ހުޅުވާފައިވާއިރު، އެ އަމުރު ތަންފީޒު ކުރުމަށް ގޮވާލައި ރާއްޖޭގެ އެކި ހިސާބުތަކުގައި ގިނަ އަދަދެއްގެ ރައްޔިތުން ދަނީ އެކިއެކި ހަރަކާތްތައް ހިންގަމުންނެވެ.
