އެމްޔޫއޯގެ ހާއްސަ ޖަލްސާއެއް ތިނަދޫގައި ބާއްވަނީ

ކުރިއަށް އޮތް ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން އެމްޔޫއޯގެ ހާއްސަ ޖަލްސާއެއް އަންނަ ބުރާސްފަތި ދުވަހުގެރޭ ގދ. އަތޮޅު ތިނަދޫގައި ބޭއްވުމަށް ނިންމައިފިއެވެ.

"ލާމަރުކަޒީ ރާއްޖެ"ގެ ނަމުގައި ބާއްވާ މި ޖަލްސާ ބޭއްވުމަށް ހަމަޖެހިފައި ވަނީ ބުރާސްފަތި ދުވަހުގެރޭ 9:00 ގައި ތިނަދޫގައެވެ. މި ޖަލްސާގައި އެމްޑީޕީގެ ލީޑަރޝިފްގެ އިސްބޭފުޅުންނާއި އިއްތިހާދުގެ ބޭފުޅުން ވާހަކަ ދެއްކުމަށް ވަނީ ހަމަޖެހިފައެވެ.

މި ޖަލްސާ ރާއްޖެޓީވީން ވަގުތުން ގެނެސްދިނުމަށް ވަނީ ނިންމާފައެވެ.

ރައީސް އަބްދުﷲ ޔާމީންގެ ވެރިކަމާ ހިތްހަމަ ނުޖެހޭ ވީހާ ގިނަ އާންމު ރައްޔިތުން މި ޖަލްސާގައި ބައިވެރިވުމަށް އިއްތިހާދުން ވަނީ ގޮވާލާފައެވެ.

ޖެނުއަރީ މަހު 14 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ފަސްކުރުމަށް ސިވިލްކޯޓުން އަމުރުކުރުމުން އިލެކްޝަން ކޮމިޝަނުން އޭޕްރިލް މަހުގެ 8 ވަނަ ދުވަހު އިންތިހާބު ބާއްވާން އިއުލާން ކުރުމަށް ފަހު އެކޮމިޝަނުން ވަނީ އެ މަހުގެ 15 ވަނަ ދުވަހަށް އިންތިޚާބު ފަސްކޮށްފައެވެ.

ކައުންސިލް އިންތިހާބުގައި ވެރިކަން ކުރާ ޕީޕީއެމްގެ ފަރާތުން ވާދަކުރާ ކެނޑިޑޭޓުން ތައާރަފްކޮށް އެޕާޓީން ވަނީ މިހާރު ރަސްމީކޮށް ކެމްޕޭން ފަށާފައެވެ. ކައުންސިލް އިންތިހާބުގެ ކެމްޕޭން ރަސްމީކޮށް އެމްޑީޕީން ފަށާފައި ނުވިނަމަވެސް އެޕާޓީން ދަނީ އިންތިހާބަށް ތައްޔާރުވުމުގެ ގޮތުން އަތޮޅުތެރޭގެ ރަށްތަކަށް ދަތުރުކުރަމުންނެވެ.