ޔުއެފާ ޗެމްޕިއަންސް ލީގުގެ ދެވަނަ ބުރުގެ މެޗުތަކުގައި ސަޕޯޓަރުން ހިންގި އަމަލުތަކާ ގުޅިގެން ފްރާންސްގެ ޕެރިސް ސެއިންޓް ޖަމައިން (ޕީއެސްޖީ) އަދި ސްވިޓްޒަލެންޑްގެ އެފްސީ ބަސެލްގެ މައްސަލަ ޔުއެފާ އިން ބެލުމަށް ނިންމައިފިއެވެ.

ޔޫރަޕްގެ ފުޓްބޯޅައިގެ މައި އިދާރާ ޔުއެފާ އިން ޕީއެސްޖީއާ ގުޅޭ ގޮތުން ބަލަނީ، ޗެމްޕިއަންސް ލީގުގެ ދެވަނަ ބުރުގައި ސްޕެއިންގެ ރެއާލް މެޑްރިޑާ ދެކޮޅަށް އަމިއްލަ ދަނޑުގައި ކުޅުނު ދެވަނަ ލެގުގެ މެޗުގައި ސަޕޯޓަރުން ބަޑިބޭހުގެ ބޭނުން ކޮށްފައިވާތީއެވެ.

މިދިޔަ އަންގާރަ ދުވަހު ކުޅުނު މެޗުގައި ޕީއެސްޖީގެ ސަޕޯޓަރުން ބަޑިބޭސް ބޭނުން ކުރުމާ ގުޅިގެން މެޗުގެ ދެވަނަ ހާފްގެ ވަކި ހިސާބަކުން ކުޅުން މެދުކަނޑާލަން ވެސް ޖެހުނެވެ.

މިސީޒަނުގައި ޗެމްޕިއަންސް ލީގުގެ ހަތަރު މެޗެއްގައި ސަޕޯޓަރުންނާ ގުޅުން ހުރި މައްސަލަތަކުގައި ޔުއެފާ އިން ޕީއެސްޖީއާ ދެކޮޅަށް ފިޔަވަޅު އަޅާފައިވެއެވެ.

އެފްސީ ބަސެލްގެ މައްސަލަ ބެލުމަށް ޔުއެފާ އިން ނިންމާފައި ވަނީ ވެސް ޗެމްޕިއަންސް ލީގުގެ ދެވަނަ ބުރުގައި މެންޗެސްޓަރ ސިޓީއާ ދެކޮޅަށް ރަށުން ބޭރުގައި ކުޅުނު މެޗުގައި ބަސެލްގެ ސަޕޯޓަރުން ބަޑިބޭހުގެ ބޭނުންކޮށްފައި ވާތީއެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު ދެވަނަ ލެގު 2-1 އިން ބަސެލް ކާމިޔާބު ކުރި ނަމަވެސް، 5-2 ގެ އެގްރިގޭޓުން މުބާރާތުގެ ކުއާޓަރ ފައިނަލްގެ ޖާގަ ކަށަވަރުކޮށްފައި ވަނީ މެންޗެސްޓަރ ސިޓީއެވެ.

މި ދެ މައްސަލާގައި ޔުއެފާގެ ކޮންޓްރޯލް، އެތިކްސް އެންޑް ޑިސިޕްލިނަރީ ކޮމިޓީ އިން މާޗް މަހުގެ 22 ވަނަ ދުވަހު ގޮތެއް ނިންމާނެއެވެ.