ބޮޑު ތަފާތަކުން މޮނާކޯ ބަލިކޮށް ޕީއެސްޖީ ފައިނަލަށް

މޮނާކޯގެ މައްޗަށް 0-5 ގެ ނަތީޖާއަކުން ކުރި ހޯދައި ފްރެންޗް ކަޕްގެ އެންމެ ފަހުގެ ޗެމްޕިއަން ޕީއެސްޖީ ފައިނަލަށް ދަތުރުކޮށްފިއެވެ.

ޕީއެސްޖީގެ ދަނޑުގައި ރޭ ކުޅުނު މި މެޗުގެ ފުރަތަމަ ގޯލު 26 ވަނަ މިނެޓުގައި ކާމިޔާބުކޮށްދިނީ ޖޫލިއަން ޑްރެކްސްލާއެވެ. އަދި ފުރަތަމަ ހާފް ނިމުމުގެ ކުރިން އެޑިސަން ކަވާނީ ވަނީ ޕީއެސްޖީގެ ދެވަނަ ގޯލު ކާމިޔާބުކޮށްދީފައެވެ.

ދެ ގޯލުގެ ލީޑަކާއެކީ ފުރަތަމަ ހާފް ޕީއެސްޖީން ނިންމާލިއިރު ދެވަނަ ހާފްގެ ކުރީކޮޅު އެޓީމުން ވަނީ، ތިންވަނަ ގޯލު ކާމިޔާބުކޮށްފައެވެ. މި ގޯލަކީ މޮނާކޯގެ އެމްބައޭގެ އަތުން ބައިކޮޅަށް ވަތް ގޯލެކެވެ.

ޕީއެސްޖީގެ ހަތަރުވަނަ ގޯލު މެޗުގެ 52 ވަނަ މިނެޓްގައި މަޓުއިޑީ ކާމިޔާބުކޮށްދިން އިރު، އެޓީމުގެ ފަހު ގޯލު މެޗުގެ 90 ވަނަ މިނެޓްގައި ކާމިޔާބުކޮށްދިނީ މާކިއުނޯސްއެވެ.

ފްރެންޗް ކަޕްގެ ފައިނަލްގައި އަންނަ މަހުގެ 27 ވަނަ ދުވަހު ޕީއެސްޖީ ބައްދަލުކުރާނީ އެންޖާސްއާ އެވެ.

ފްރެންޗް ކަޕްގެ ފައިނަލަށް ޕީއެސްޖީ ދަތުރުކުރިއިރު، އެޓީމުން ވަނީ ދާދިފަހުން، މޮނާކޯ ބަލިކުރުމަށް ފަހު، ފްރެންޗް ލީގު ކަޕް ވެސް ކާމިޔާބުކޮށްފައެވެ.