ކްލޯއީ އަށް ލިބެނީ އަންހެން ކުއްޖެއް
ކްލޯއީއަށް ލިބޭ ދަރީގެ ޖިންސު އޭނާ ހާމަކޮށްފައިވަނީ ބަލިވެއިންތާ 8 މަސްފަހުން
ކްލޯއީ އާއި އޭނާގެ ލޯބިވެރިޔާ ޓްރިސްޓަން ތޮމްޕްސަން
ކްލޯއީ ކާޑޭޝިއަންއަށް ލިބެނީ އަންހެން ކުއްޖެއް ކަމަށް އޭނާ ބުނެފިއެވެ. ކްލޯއީއަށް ލިބޭ ދަރީގެ ޖިންސު އޭނާ ހާމަކޮށްފައިވަނީ ބަލިވެއިންތާ އަށް މަސްފަހުންނެވެ.
ކްލޯއީއަށް ލިބެނީ އަންހެން ކުއްޖެއް ކަމަށް އިއުލާންކޮށްފައި ވަނީ އޭނާ ފެންނަ ރިއަލިޓީ ޝޯ ކަމަށްވާ ކީޕިން އަޕު ވިތު ކާޑޭޝިއަންގައެވެ.
ކްލޯއީ ވަނީ އޭނާގެ ދަރިފުޅު ބޮޑުވުމުން ވާނީ ލަވަކިޔުންތެރިއަކަށް ކަމަށް ބުނެފައެވެ. އަދި އެދަރިފުޅާމެދު ދެކޭ ހުވަފެންތައް އޭނާ ވަނީ ހާމަކޮށްފައެވެ. ކްލޯއީ ބުނާ ގޮތުގައި އޭނާގެ އާއިލީ ޑްރާމާ "ކީޕިން އަޕް ވިތު ކާޑޭޝިއަން" އޭނާގެ ދަރިފުޅަށް ބެލެން ފެށޭނީ އެކުއްޖާގެ އުމުރުން 13 އަހަރުންނެވެ. އަދި ލޯބީގެ ގޮތުން ކުއްޖަކާ ގުޅެވޭނީ 15 އަހަރު ވުމުންނެވެ. ކްލޯއީ އޭނާގެ ދަރިފުޅާމެދު ފޮނި ހުވަފެންތައް ދެކެމުން އަންނައިރު އޭނާ ވިހާނެ ކަމަށް ބެލެވެނީ އަންނަ އެޕްރީލްމަހުގެ ތެރޭގައެވެ.
މީގެ ކުރިން ކްލޯއީ ބަލިވެއިން ކަމަށް ބުނެ އާންމުކޮށްފައިވާ ފުރަތަމަ ފޮޓޯގައި ޖަހާފައި ވަނީ ކުއްޖަކު ލިބުން އެއީ އޭނާ އެންމެ ދެކޭ ހުވަފެން ކަމަށެވެ. އޭނާ އާއި ލޯބިވެރިޔާ ޓްރިސްޓަން އަށް ކުއްޖަކު ލިބެން އުޅޭ ކަމަށާއި އެކަމަށް ހެއްދެވި ފަރާތަށް ޝުކުރުވެރިވާ ކަމަށް ކްލޯއީ ބުނެފައިވެއެވެ. އަދި ބަލިވެ އިނުމުން އޭނާއަށް ޓްރިސްޓަން އަޅާލާ އަޅާލުމަށާއި ދޭ ލޯތްބަށް ކްލޯއީ ވަނީ ޝުކުރު އަދާކޮށްފައެވެ. ބަލިވެ އިނނުން އެއީ އޭނާގެ ހަޔާތުގައި އެކިކަހަލަ އިހްސާސްތައް ގެނުވާ ފުރަތަމަ ފަހަރު ކަމަށް ވެސް ކްލޯއީ ވަނީ ބުނެފައެވެ.
މިއީ ކްލޯއީގެ އަލަތު ދަރިފުޅަށް ވީނަމަވެސް އޭނާގެ ލޯބިވެރިޔާ ޓްރިސްޓަން އަށް ވަނީ އެއް އަހަރުގެ ކުއްޖަކު ލިބިފައެވެ. އެއީ އޭނާގެ ކުރީގެ ލޯބިވެރިޔާ ޖޯޑަން ކެރައިގް އަށެވެ.
