ބޯޑަރު ކައިރިން ދުރަށް ޖެހުމަށް މިޔަންމާ ސިފައިންނަށް ބަންގްލަދޭޝްއިން އަންގައިފި

މިޔަންމާ އާއި ބަންގްލަދޭޝް ހިއްސާކުރާ ބޯޑަރު ކައިރިން ފަހަތަށް ޖެހުމަށް މިޔަންމާގެ ސިފައިންނަށް ބަންގްލަދޭޝްއިން އަންގައިފިއެވެ.

ބަންގްލަދޭޝްއިން މިހެން އަންގާފައި މިވަނީ ދެޤައުމު ގުޅޭ ސަރަހައްދީ އިމުގެ ކައިރީގައި ރޮހިންޔާ މުސްލިމުންގެ 5 ހާހެއްހާ ރެފިއުޖީން ކޭމްޕް ޖަހައިގެން ތިބި ސަރަހައްދަށް ގިނަ އަދަދެއްގެ ސިފައިން މިޔަންމާއިން ފޮނުވުމާއި ގުޅިގެންނެވެ. އެސަރަހައްދަށް ސަތޭކައަށްވުރެ ގިނަ ސިފައިން ބަރު ހަތިޔާރާއިއެކު ޖަމާވެފައިވާކަމަށް ވެެއެވެ.

ރޮހިންޔާ ރެފިއުޖީން ތިބީ ދެޤައުމުން ބޯޑަރު ވަކިކުރުމަށް ޖަހާފައިވާ ފެންސުގެ މެދުގައިވާ ބިމެއްގައެވެ. އެހެން ނަމަވެސް އެބިމަކީ މިޔަންމާއަށް ނިސްބަތްވާ ބިމެކެވެެ.

ބޯޑަރު ކައިރިއަށް ސިފައިން ޖަމާކުރުމާއި ގުޅުގެން ބަންގްލަދޭޝްއިން ވަނީ އެޤައުމުގައި ހުންނަވާ މިޔަންމާގެ ސަފީރު ޚާރިޖިއްޔާއަށް ހާޒިރުކޮށް، އެކަން އެހެން ނުކުރުމަށް އަންގާފައެވެ.

މިމައްސަލައިގައި ބަންގްލަދޭޝްގެ ސަރަހައްދީ ރޮނގު ބަލަހައްޓާ ސިފައިން ވަނީ މިޔަންމާގެ ސަރަހައްދީ ރޮނގު ބަލަހައްޓާ ސިފައިންނާއި ބައްދަލުކުރުމަށް އެދިފައެވެ. އެހެން ނަމަވެސް މިޔަންމާގެ ބޯޑަރު ބަލަހައްޓާ ސިފައިންގެ 'ވެރިން' ތަންކޮޅެއް 'ބުރަކޮށް އުޅުއްވާތީ' ނުވަތަ 'ވަޑައިގެން އޮފީހުގައި ނޫޅުއްވާތީ' ބައްދަލުކުރެވޭ ގޮތް ވެފައިނުވާކަމަށް ބަންގްލަދޭޝްއިން ބުނެއެވެ.

ސިފައިން ފަހަތަށް ނުޖެއްސި ނަމަވެސް، ބަންގްލަދޭޝްގެ ކަންބޮޑުވުންތަކާއިއެކު މިޔަންމާއިން ވަނީ ބޯޑަރު ކައިރިއަށް ގެނައި ބަރު ހަތިޔާރު އެސަރަހައްދުން ގެންގޮސްފައެވެ.

މިޔަންމާގެ ބައި މަދު، މުސްލިމް ރޮހިންޔާ ދަރިކޮޅުގެ މީހުންނަށް އެޤައުމުގެ ސިފައިން ކުރާ އަނިޔާތަކުން ސަލާމަތްވުމަށް އެތައް ލައްކަ ބަޔަކު ރެފިއުޖީންގެ ގޮތުގައި ވަނީ ބަންގްލަދޭޝްއަށް ހިޖުރަކޮށްފައެވެ. ރޮހިންޔާ މުސްލިމުންނަކީވެސް މިޔަންމާގެ ބަޔަކަށްވާއިރު، އެމީހުންނަކީ ބަންގްލަދޭޝްއަށް ނިސްބަތްވާ ބައެއްކަމަށް ބުނެ، މިޔަންމާއިން އެމީހުންނަށް ރަށްވެހިކަން ދީފައެއް ނުވެއެވެ. އަދި އެމީހުންގެ އަސާސީ ހައްޤުތަކުން މަހުރޫމްކޮށްފައިވާއިރު، ރޮހިންޔާ ދަރިކޮޅާއި ދެކޮޅަށް މިޔަންމާ ސަރުކާރުން މިިދިޔަ އަހަރުން ފެށިގެން ހިންގަމުން އަންނަ އަމަލުތައް އދއިން ސިފަކޮށްފައިވަނީ އެއީ ނަސްލެއް ނައްތާލުމަށް މިޔަންމާ ސަރުކާރުން ހިންގާ ޖަރީމާއެއްގެ ގޮތުގައެވެ.