ޤާނޫނީ ހަމަތަކަށް ބަލާއިރު ރައީސް ޔާމީންގެ ވެރިކަމުގެ ސައްހަ ކަމެއް ނެތް: މެމްބަރު އަލީ ނިޒާރު
2 މާރިޗު 2018 | ހުކުރު 03:43"ރައީސް ޔާމީން ވެރިކަމަށް ވަޑައިގެންނެވި ފަހުން މިރާއްޖޭގައި ކަންކަން ހިނގަނީ ދުނިޔޭގެ އެއްވެސް ތަނެއްގައި ކަން ހިނގާ ގޮތަކަށް ނޫން"
ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު
ދިވެހިރާއްޖޭގައި މިހާރު މިއޮތް ސަރުކާރަކީ ޤާނޫނަށް ތަބާނުވާ ސަރުކާރެއްގެ ގޮތުގައި ފެނިގެންދާ ކަމަށާއި، ޤާނޫނީ ހަމަތަކަށް ބަލާއިރު ރައީސް އަބްދުﷲ ޔާމީންގެ ވެރިކަމުގެ ޞައްހަ ކަމެއް ނެތް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން އަލީ ނިޒާރު ވިދާޅުވީ، ރައީސް ޔާމީން ވެރިކަމަށް ވަޑައިގެންނެވި ފަހުން ރާއްޖޭގައި ކަންކަން ހިނގަނީ ދުނިޔޭގެ އެއްވެސް ތަނެއްގައި ކަން ހިނގާ ގޮތަށް ނޫން ކަމަށެވެ. އަދި މިސަރުކާރު ބަލައިގަންނަން ޖެހެނީ ދިވެހިރާއްޖޭގައި ލިޔެވިފައިވާ ޤާނޫނުތަކަށް ތަބާނުވާ ސަރުކާރެއްގެ ގޮތުގައި ކަމަށާއި، ސުޕްރީމް ކޯޓުގެ އަމުރަށް ތަބާވެވަޑައިނުގަންނަވާ ސަރުކާރެއްގެ ގޮތުގައި ކަމަށް އަލީ ނިޒާރު ވިދާޅުވިއެވެ.
އެގޮތުން ރާއްޖޭގެ އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރަކު ހައްޔަރުކޮށް ޖަލަށް ލާފައިވުމާއި، ރާއްޖޭގައި ވެރިކަން ކުރައްވާފައިވާ ރައީސުން ޖަލަށް ލުމާއި، ވެރިކަން ކުރާ ޕާޓީ، ޕީޕީއެމް ހިމެނޭ ގޮތަށް ސިޔާސީ ޕާޓީތަކުގެ ހުރިހާ ލީޑަރުން ޖަލަށް ލާފައިވާކަން ފާހަގަ ކުރައްވައި އަލީ ނިޒާރު ވިދާޅުވީ، މިދަރަޖަ އަށް ދިޔުމުން ކަން ހިނގައިދަނީ ރަނގަޅަށް ކަމަށް ގަބޫލް ނުކުރެއްވޭ ކަމަށެވެ.
މީގެ އިތުރުން ރައްޔިތުންގެ މަޖިލީހުގެ މެޖޯރިޓީ އިދިކޮޅު ފަރާތްތަކަށް ލިބުމާ އެކު ރައްޔިތުން އިންތިޚާބު ކޮށްފައިވާ މެމްބަރުން މަޖިލީހަށް ވަނަ ނުދީ ހިފެހެއްޓުމަށް ފަހު ކަންކުރި ގޮތާއި، ދިވެހިރާއްޖޭގެ ސުޕްރީމް ކޯޓަށް ސިފައިން ފޮނުވައިގެން ފަނޑިޔާރުން ހައްޔަރު ކުރުމަށް ކަން ކޮށްފައިވާ ގޮތް އަލީ ނިޒާރު ފާހަގަ ކުރެއްވިއެވެ.
އެހުރިހާ ކަމަކަށް ބަލާއިރު، ރާއްޖޭގެ ސިޔާސީ ލީޑަރުން ރައީސް ޔާމީނާ އިތުރަށް ދައްކަވަން ޖެހޭ ވާހަކަތަކެއް ހުރި ކަމަށް ގަބޫލުނުކުރެއްވޭ ކަމަށް އޭނާ ވިދާޅުވިއެވެ.
އަލީ ނިޒާރު ވިދާޅުވީ 2013 ވަނަ އަހަރު ބޭއްވި ރިޔާސީ އިންތިޚާބަށް ފަހު ރައީސް ޔާމީން ވެރިކަމަށް ވަޑައިގެން، ދިވެހިރާއްޖެ ޞުލްހަވެރި ގައުމެއްގެ ގޮތުގައި ގެންދިއުމަށް މަސައްކަތް ކުރައްވާނެ ކަމަށް އުއްމީދު ކުރެއްވި ކަމަށާއި، އެހެން ނަމަވެސް ރައީސް ޔާމީންގެ ވެރިކަމުގައި ކުރިން ހީކުރި ވަރަށް ވުރެ މާބޮޑަށް ފަހަތަށް މި ރާއްޖެ ގެންގޮސްފައިވާ ކަމަށެވެ.
މީގެ އިތުރުން ރާއްޖޭގެ ޤާނޫނުތަކަށް ތަބާނުވާ ވެރިޔެއްގެ ދިފާއުގައި ދިވެހިރާއްޖޭގެ ސިފައިންނާއި ފުލުހުން ތިބެންޖެހޭ ސަބަބެއް ވިސްނިވަޑައިނުގަންނަވާ ކަމަށާއި، ޣައިރު ޤާނޫނީ އަމުރުތަކަށް ސަލާމަތީ ޚިދުމަތްތަކުން ކިޔަމަންވާން ނުޖެހޭނެ ކަމަށް ޤާނޫނު އަސާސީގައި ވަރަށް ސާފުކޮށް ބަޔާން ކޮށްފައިވާ ކަމަށް އަލީ ނިޒާރު ވިދާޅުވިއެވެ. އަދި ރައްޔިތުން އޮބިއަޅައިގެން، އަނދަގޮނޑި ޖަހައިގެން ވެރިކަން ކުރަން އުޅެގެން ދިމާވާނެ ހުރިހާ މުސީބާތެއް ރައީސް ޔާމީން މިހާރު ތަޖުރިބާ ކުރައްވަމުން ގެންދަވާ ކަމަށް އަލީ ނިޒާރު ވިދާޅުވިއެވެ.
