އީރާނުގެ އަމަލުތާކާއި ބެހޭގޮތުން ރައީސް ޓްރަމްޕް ސައުދީއާއި ޔޫއޭއީގެ ވެރިންނާ ވާހަކަ ދައްކަވައިފި

އީރާނުގެ "ހަމަނުޖެހުން އުފެއްދުމުގެ ހަރަކާތްތަކާއި" ސަރަހައްދުގެ އިގްތިސާދީ އަދި ސަލާމަތީ ކަންތައްތަކާއި ބެހޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ސައުދީގެ އަރަބިއްޔާ އާއި އެކުވެރި އަރަބި އިމާރާތުގެ ލީޑަރުންނާ އަންގާރަ ދުވަހު ފޯނުން ގުޅުއްވައި މަޝްވަރާކުރައްވައިފިކަމަށް ވައިޓް ހައުސްއިން ބުނެފިއެވެ.

ރައީސް ޓްރަމްޕް މަޝްވަރާ ކުރައްވާފައިވަނީ ސައުދީގެ ވަލީއަހުދު މުހައްމަދު ބިން ސަލްމާންއާއި އަބޫދާބީގެ ވަލީއަހުދު ޝެއިޚް މުހައްމަދު ބިން ޒައިދް އަލް ނަހްޔާންއާއިއެވެ.

ވައިޓް ހައުސްއިން ބުނެފައިވާގޮތުގައި ރައީސް ޓްރަމްޕް ވަނީ އިރާނުން ކުރިޔަށްގެންދާ ހަމަނުޖެހުން އުފެއްދުމުގެ ހަރަކާތްތަކާއި ޓެރެރިޒަމާއި ހައްދު ފަހަނަ އެޅުމާއި ދެކޮޅަށް ކުރެވިދާނެ ކަންކަމާއި ބެހޭގޮތުން އެ ގައުމުތަކުން ފާހަގަކުރައްވާފައިވާ ކަންކަމާއިގުޅިގެން އެ ގައުމުތަކަށް ޝުކުރު އަދާކުރައްވާފައެވެ. އެމެރިކާގެ ކުރީގެ ރައީސް އޮބާމާގެ ވެރިކަމުގެ ދުވަސްވަރު ދުނިޔޭގެ ބާރުތަކާއި އީރާނާ ދެމެދުވި އެއްބަސްވުމުގެ ދަށުން އެ ގައުމުން ވަނީ ނިއުކްލިއަރ ޕްރޮގްރާމްގެ މައުލޫމާތު ބައިނަލްއަގްވާމީ މުޖުތަމައުއަށް ދީފައެވެ. އަދި އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާފައެވެ. ނަމަވެސް ރައީސް ޓްރަމްޕްވަނީ 2015 ވަނަ އަހަރު ވި އެ އެއްބަސްވުމަށް ފާޑުވިދާޅުވެ އެ އެއްބަސްވުން އުވާލެއްވުމަށް މަސައްކަތް ފައްޓަވާފައެވެ.