އަލީ ހަމީދުގެ އަނބިކަނބަލުން އޮންނަ ގޮޅިއަށް ފިރިހެނުން ވަންނަ މައްސަލަ އެޗްއާރްސީއެމްއަށް!
ނާސިރާ ހައްޔަރުކޮށްފައި ވަނީ ފެބްރުއަރީ 7 ވަނަ ދުވަހުގެ ރޭ
ދޫނިދޫ | ގޫގުލް
ފަނޑިޔާރު އަލީ ހަމީދުގެ އަނބިކަނބަލުން ފާތުމަތު ނާސިރާ ހައްޔަރުކޮށް، ދޫނިދޫގައި އެކަމަނާ ގެންގުޅެމުންދާ ގޮޅިއަށް ފިރިހެނުން ވަންނަ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އަށް ހުށަހަޅައިފިއެވެ.
އަންހެނުންގެ ޙައްޤުތައް ކަށަވަރުކޮށްދީ، އެކަނބަލުން ބާރުވެރިކުރުމަށް މަސައްކަތްކުރާ ހޯޕް ފޯ ވުމަން އިން ބުނީ، ފުލުހުން ހައްޔަރުކޮށްފައިވާ، އައްޑޫސިޓީ ހުޅުދޫ، ކާމިނީގޭ، ފާތުމަތު ނާސިރާ ހައްޔަރުގައި ބަހައްޓާފައި ހުންނަ ގޮޅިއަށް ރޭގަނޑު ފިރިހެނުން ވަދެ، ފަތިސްވަންދެން ތިބޭ ކަމުގެ މަޢުލޫމާތު ލިބުމުން، އެ މައްސަލަ އެޗްއާރްސީއެމްއަށް ހުށަހަޅާފައިވާ ކަމަށެވެ.
ހޯޕް ފޯ ވުމަން އިން ބުނީ، އެ މައްސަލަ އެޗްއާރްސީއެމަށް ހުށަހެޅީ، ހިނގަމުންދާ އެ ކަމަކީ ރާއްޖޭގެ ޤާނޫނު އަސާސީ އާއި ރާއްޖޭގައި އަމަލުކުރަމުންދާ އެންޓި ޓޯޗަރ އެކްޓާ ޚިލާފު ކަމަކަށް ވާތީ ކަމަށެވެ.
މި މައްސަލައާ ގުޅޭ ގޮތުން ހޯޕް ފޯ ވުމަން އިން އިތުރު މަޢުލޫމާތެއް ހާމަކޮށްފައި ނުވާއިރު، މިކަމާ ގުޅޭ ގޮތުން އިތުރު މަޢުލޫމާތެއް އަދި ވަނީ ލިބޭ ގޮތް ނުވެފައެވެ.
ހޯޕް ފޯ ވުމަން އިން އެޗްއާރްސީއެމަށް މިފަދަ މައްސަލައެއް ހުށަހަޅާފައިވާއިރު، ފުލުހުން ވަނީ އެފަދަ ކަމެއް ހިނގާފައި ނުވާނެ ކަމަށް ބުނެފައެވެ. ފުލުހުން ކޮށްފައިވާ ޓްވީޓެއްގައި ބުނެފައިވަނީ، ފުލުހުންގެ ބަންދުގައިވާ އެއްވެސް ފަރާތެއްގެ ހައްޤަކަށް އުނިކަން ލިބޭނެ ނުވަތަ އިންސާނީ ކަރާމަތަށް އިޙުތިރާމް ގެއްލޭފަދަ އެއްވެސް އަމަލެއް ފުލުހުން ހިންގާފައި ނުވާނެކަން ފުލުހުން ޔަޤީންކޮށްދޭ ކަމަށެވެ.
މި ފެބްރުއަރީ މަހުގެ 5 ވަނަ ދުވަހުގެރޭ ރާއްޖޭގައި ކުއްލި ނުރައްކަލުގެ ހާލަތު އިޢުލާނުކޮށް، ހަމައެރޭ ފަނޑިޔާރު އަލީ ހަމީދު ހައްޔަރުކުރުމަށް ފަހު، އެމަނިކުފާނުގެ އަނބިކަނބަލުން ހައްޔަރުކޮށްފައި ވަނީ، ފެބްރުއަރީ ހަތްވަނަ ދުވަހުގެރެއެވެ.
