އީޔޫގެ ނިންމެވުމަށް ރައީސް ނަޝީދު މަރުހަބާ ދަންނަވައިފި
އީޔޫ ކައުންސިލުން ވެސް ވަނީ ފެބްރުއަރީ 1 ގައި ނެރުނު އަމުރު ތަންފީޒުކުރުމަށް ގޮވާލާފައި
ކުރީގެ ރައީސް މުހައްމަދު ނަޝީދު
ޔޫރަޕިއަން ޔޫނިއަން (އީޔޫ) ގެ ކައުންސިލުން ރާއްޖެއާ މެދު ނިންމި ނިންމުންތަކަށް ކުރީގެ ރައީސް މުހައްމަދު ނަޝީދު މަރުހަބާ ދަންނަވައިފިއެވެ.
އެމިނިކުފާނު ކުރެއްވި ޓްވީޓެއްގައި ވަނީ ސުޕްރީމް ކޯޓުން ފެބްރުއަރީ މަހުގެ 1 ވަނަ ދުވަހު ނެރުނު އަމުރާ އެއްގޮތަށް ސިޔާސީ ލީޑަރުން މިނިވަން ކުރުމަށާއި 12 މެމްބަރުންގެ ގޮނޑި ނުގެއްލޭ ކަމަށް އީޔޫގެ ކައުންސިލުން ނިންމާފައިވާ ނިންމުމަށް މަރުހަބާ ދަންނަވާ ކަމަށެވެ.
އީޔޫ ކައުންސިލުން ވަނީ ހޯމަ ދުވަހު ބޭއްވި އެ ކައުންސިލްގެ ބައްދަލުވުމުގައި ރާއްޖެއާ ގުޅޭ ގޮތުން 7 ނުކުތާއެއް ފާހަގަކޮށް އެއްބަސްވެފައެވެ. ވިލާތުގެ އިއްތިހާދުގެ ކައުންސިލުން ރާއްޖެއާ މެދު މިފަދަ ނިންމުމެއް ނިންމާފައިވާއިރު، މިއީ އެ ކައުންސިލުން ރާއްޖެއާ މެދު މިފަދަ ނިންމުމެއް މިގޮތަށް ނިންމި ފުރަތަމަ ފަހަރެވެ. މި އެއްބަސްވުންތަކުގައި ވެސް ވަނީ 1 ފެބްރުއަރީގައި ސުޕްރީމް ކޯޓުން ނެރުނު އަމުރު ތަންފީޒުކުރުމަށް ގޮވާލައްވާފައެވެ.
އީޔޫގައި ހިމެނޭ މުހިންމު ބޮޑު ގައުމުތަކަކުން ވަނީ ވެސް މި އަމުރު ތަންފީޒުކުރުމަށް ގޮވާލާފައެވެ. އެހެން ނަމަވެސް ދިވެހި ސަރުކާރުން ވަނީ މި އަމުރު ތަންފީޒުކުރުމަށް ދެކޮޅު ހަދާފައެވެ.
