ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު މުހައްމަދު ނަޝީދަށް ފިޔަވަޅު އަޅަން ނުކެރުމުން އެނގެނީ މެމްބަރުންނާއި ކުޅެން ރައީސް އަބްދުﷲ ޔާމީން ފަސްޖެހިއްޖެކަން ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު މުހައްމަދު މުސްތަފާ ވިދާޅުވެއްޖެ އެވެ.
ކުއްލި ނުރައްކަލުގެ ހާލަތުގެ ގަރާރަށް މިދިޔަ އަންގާރަ ދުވަހު ރައްޔިތުންގެ މަޖިލިހުގައި ނެގި ވޯޓުގައި ކުޅުދުއްފުށީ ދެކުނު ދާއިރާގެ ޕީޕީއެމްގެ މެމްބަރު މުހައްމަދު ނަޝީދު ބައިވެރިވެވަޑައިގެންފައެއް ނުވެ އެވެ. ވޯޓަށްއެހި ވަގުތުގައި މެމްބަރު ނަޝީދު ތަޅުމުގައި އިންނެވި އެވެ. އެ ދުވަހުގެ ޖަލްސާގައި ކުއްލި ނުރައްކަލުގެ ހާލަތުގެ ގަރާރަށް ވޯޓަށް އެހިއިރު ޕީޕީއެމް އޮތީ ގަރާރަށް ތާއީދުކޮށް ވޯޓު ދިނުމަށް ތްރީލައިން ވިޕެއްވެސް ނެރިފަ އެވެ.
ޕީޕީއެމްގެ ޕާލިމެންޓްރީ ގުރޫޕުން ނެރުނު ވިޕާ ހިލާފުވެއްޖެކަމަށް ބުނެ ބައެއް މެމްބަރުންނަށް ފިޔަވަޅު އަޅައި ޕާޓީންވެސް މީގެކުރިން ވަކިކޮށްފައިވާއިރު، އެ ޕާޓީން ނިންމާފައިވަނީ މެމްބަރު ނަޝީދުގެ މައްސަލަ ނުބެލުމަށެވެ.
އެ މައްސަލަ ނުބެލުމަށް ޕީޕީއެމުން ނިންމި ނިންމުމަށް އިޝާރަތްކުރައްވާ މެމްބަރު މުހައްމަދު މުސްތަފާ ވިދާޅުވީ ކަނޑައެޅިގެން ވިޕާ ހިލާފުވުމުން ފިޔަވަޅު އަޅަން ނުކެރުމުން އެނގެނީ ރައީސް ޔާމީންގެ ފިނޑިކަމާއި މެމްބަރުންނާއި ކުޅެން ފަސްޖެހިފައިވާކަންކަމަށެވެ. އޭގެއިތުރުން މެމްބަރު މުސްތަފާ ކުރައްވާފައިވާ އިތުރު ޓުވީޓެއްގައި ވިދާޅުވެފައިވަނީ ފްލޯ ކްރޮސިންގގެ ވާހަކައަކީ މެމްބަރުންތައް ރައީސް ޔާމީން ދޫކޮށްފައި ދިޔައީމަ ދެއްކި ވާހަކައެއް ކަމަށެވެ. އަދި އެއީ ޤާނޫނު އަސާސީ ދަންނަ ކަމެއް ނޫންކަމަށްވެސްް މުސްތަފާ ވިދާޅުވި އެވެ.
އޭނާ ވިދާޅުވީ ސުޕްރީމް ކޯޓަށްވެސް ޤާނޫނު އަސާސީގައި ނެތް ކަމެއް މާނަކޮށްގެން ޤާނޫނެއް ނުހެދޭނެ ކަމަށެވެ. އަދި ގާނޫނު ހެދޭނީ އޮތްކަމެއްގެ މައްޗަށްކަމަށާއި، ޤާނޫނު ހެދުމާއި އުނިއިތުރު ގެނަުއުމަކީ ރައްޔިތުންގެ މަޖިލީހަށް ލިބިގެންވާ ބާރެއް ކަމެވެ.
Floor-crossing ge vaahaka akee memberun thah Yameen dhookoffa dhiyaeema dhekki vaahaka eh! QA dhanna kameh noon. Adhi SC ah ves QA ga neiy kameh maana koggen qaanooneh nuhedheyne! Oiy’kamegge macchah qaanoon hingeynee. Qaanoon hedhumaa, uni ithuru genamuge haqqu othee Majilis ah!
— Mohamed Musthafa (@Thimarafushi) February 25, 2018
ޕީޕީއެމްގެ ވިޕްތަކައި ހިލާފުވެގެންކަމަށް ބުނެ ބައެއް މެމްބަރުން ޕާޓީން އަމިއްލައަށް ވަކިކޮށް، އެ މެމްބަރުންގެ މެމްބަރުކަމުގެ ގޮނޑި ގެއްލިފައިވާކަމަށް މީގެކުރިން ޕީޕީއެމުން ނިންމާފައިވެއެވެ. އެ މެމްބަރުންގެ ގޮނޑީގެ މައްސަލާގައި ބާއްވާ ފުރަތަމަ އަޑުއެހުން އަންނަ އަންގަރަ ދުވަހަށް ވަނީ ތާވަލްކޮށްފަ އެވެ.