އައްޑޫ މުޒާހަރާ އިން ޑެޕިއުޓީ މޭޔަރާ އެކު 5 މީހަކު ހައްޔަރުކޮށްފި

ރައްޔިތުންގެ މަޖިލީހުގެ 12 މެމްބަރުންގެ ގޮނޑި ނުގެއްލޭ ކަމާއި ސިޔާސީ ހައްޔަރީން މިނިވަން ކުރަން ސުޕްރީމް ކޯޓުން ފެބްރުއަރީ 1 ގައި ކުރި އަމުރު ތަންފީޒުކުރަން ގޮވާލައި އައްޑޫ ސިޓީގައި ކުރި މުޒާހަރާގެ ތެރެއިން އެ ސިޓީގެ ޑެޕިއުޓީ މޭޔަރު މުހައްމަދު ޔަޝްރިފާ އެކު ފަސް މީހަކު ހައްޔަރުކޮށްފިއެވެ.

ޔަޝްރިފްގެ އިތުރުން އައްޑޫ ސިޓީގެ އެމްޑީޕީގެ ރައީސް އިބްރާހިމް ރަޝީދު (އިބްރޭ) އާއި ހިތަދޫ މެދު ދާއިރާގެ ރައީސް މޫސާ މުހައްމަދު ވަނީ ހައްޔަރުކޮށްފައެވެ. އެ މީހުން ހައްޔަރުކުރީ މުޒާހަރާގެ ބައިވެރިންނަށް ލިންކް ރޯޑުން ހުރަސް އެޅުމުން، ހިތަދޫ ބޮޑު މަގަށް މުޒާހަރާ ބަދަލުކޮށް ހިނގަމުން ދަނިކޮށެވެ.

އައްޑޫގައި މުޒާހަރާ ފެށީ ހިތަދޫ އެމްޑީޕީ ހަރުގެ ކުރިމަތިންނެވެ. މުޒާހަރާގެ ބައިވެރިން ލިންކް ރޯޑުން ދަނިކޮށް، އެސްއޯ ފުލުހުން ހުރަސް އެޅުމުން އެއްވުމުގެ ބައިވެރިން ހިތަދޫ ބޮޑު މަގަށް މުޒާހަރާ ބަދަލުކުރިއެވެ. ނަމަވެސް ބޮޑު މަގުން ވެސް އެއްވުމުގެ ބައިވެރިންނަށް ކުރިއަށް ދިޔަ ނުދީ ފުލުހުން ހުރަސް އަޅައި ހައްޔަރުކުރިއެވެ.

ފެބްރުއަރީ 1 ވަނަ ދުވަހުން ފެށިގެން މާލޭގައި މުޒާހަރާކުރަމުންދާއިރު، މި މަހުގެ 16 ވަނަ ދުވަހުން ފެށިގެން އައްޑޫ އާއި ބައެއް އެހެން ރަށްރަށުގައި ވެސް ކޮންމެ ދުވަހަކު ދަނީ މުޒާހަރާކުރަމުންނެވެ.

އައްޑޫގައި ގުޅިފައިވާ ޕާޓީތަކަސް ފުލުހުން ހުރަސް އަޅަމުންދާއިރު ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހީމް ދީދީ ހުކުރު ދުވަހު އައްޑޫ އަށް ވަޑައިގަތުމުން ސަރުކާރަށް ތާއީދުކުރާ ފަރާތްތަކަށް ފުލުހުން ވަނީ ހިމާޔަތް ދީފައެވެ.

އައްޑޫގެ މޭޔަރު އަބްދުﷲ ސޯދިގު (ސޯބެ) ވިދާޅުވީ ހައްޔަރުކުރި މީހުންނަށް އަނިޔާކުރި ކަމަށާއި ފެބްރުއަރީ 1 ގައި ސުޕްރީމް ކޯޓުގެ ފަސް ފަނޑިޔާރު ސޮއިކުރައްވައި ނެރުއްވި އަމުރު ތަންފީޒުކުރަންދެން އައްޑޫގައި ކޮންމެ ދުވަހަކު މުޒާހަރާތައް ކުރިއަށް ގެންދާނެ ކަމަށެވެ.