ސޯމާލިއާގެ ވެރިރަށް މޮޤަދިޝޫގައި އަމިއްލަ އަށް މަރުވެގެން ދިން ކާރު ބޮމުގެ ދެ ހަމަލާއެއްގައި 18 މީހަކު މަރުވެއްޖެ އެވެ.

މޮޤަދިޝޫގައި ހުންނަ ސޯމާލިއާގެ ރައީސްގެ ގެކޮޅުގެ ކައިރީގައި ހުކުރު ދުވަހު ދިން މިހަމަލާތަކުގައި އިތުރު 20 މީހަކު ޒަޚަމްވެފައިވާ ކަމަށް، ސިއްހީ އެހީތެރިންނާއި ހަވާލާދީ މީޑިއާ ރިޕޯޓްތައް ބުނެއެވެ.

ސޯމާލިއާގައި ހަރަކާތްތެރިވާ ޓެރަރިސްޓް ޖަމާއަތެއް ކަމަށްވާ އަލް ޝަބާބް އިން ވަނީ މިހަމަލާގެ ޒިންމާ ނަގާފައެވެ.

ސޯމާލިއާގެ މީޑިއާތަކާއި ވާހަކަ ދައްކަވަމުން އެގައުމުގެ ފުލުހުންގެ އޮފިސަރެއް ކަމަށްވާ މޭޖަރ މުޙައްމަދު އަޙުމަދު ވިދާޅުވީ، ފުރަތަމަ ހަމަލާ ދީފައިވަނީ ރިޔާސީ ގަނޑުވަރުގެ ކައިރީގައި ކަމަށާއި، ދެވަނަ ހަމަލާ ދީފައިވަނީ އެސަރަހައްދުގައި ހުންނަ މަޝްހޫރު ހޮޓަލެއްގެ ކައިރީގައި ކަމަށެވެ.

މިހަމަލާ ދީފައިވަނީ ވެރިރަށް މޮޤަދިޝޫގައި ޓެރަރިސްޓް ހަމަލާއެއް ދީފާނެ ކަމުގެ އިންޒާރު ސޯމާލިއާ ސަރުކާރުން ދިންތާ އެއް ދުވަސް ފަހުންނެވެ.

ސޯމާލިއާގައި އަލް ޝަބާބްގެ ހަނގުރާމަވެރިންގެ ހަމަލާތައް އާއްމުވި ނަމަވެސް، މިހަމަލާ ދީފައިވަނީ ދުވަސްތަކެއްގެ މެދު ކެނޑުމަކަށްފަހު އެވެ.

އެންމެ ފަހުން މިފަދަ ހަމަލާއެއް ދީފައިވަނީ މިދިޔަ ޑިސެމްބަރު މަހުގެ ތެރޭގައެވެ. މޮޤަދިޝޫގައި ހުންނަ ސޯމާލިއާގެ ފުލުހުން ތަމްރީން ކުރާ މައި އެކަޑަމީގެ ތެރޭގައި އަމިއްލަ އަށް މަރުވެގެން އަލް ޝަބާބްގެ ހަނގުރާމަވެރިޔަކު ދިން އެހަމަލާގައި ފުލުހުންގެ 18 އޮފިސަރަކު މަރުވިއެވެ.

މީގެ އިތުރުން އޮކްޓޯބަރު މަހުގެ ތެރޭގައި މޮޤަދިޝޫގައި ދިން ޓްރަކް ބޮމުގެ ހަމަލާއެއްގައި 512 މީހަކު މަރުވެފައިވެއެވެ. ސޯމާލިއާގެ ތާރީޚުގައި ދިން އެންމެ ނުރައްކާތެރި ހަމަލާގެ ގޮތުގައި ބެލެވޭ ޓްރަކް ބޮމުގެ ހަމަލާ އަކީވެސް އަލްޤައިދާ ޖަމާއަތާއި ގުޅުން އޮންނަ އަލް ޝަބާބްގެ ހަމަލާއެއް ކަމަށް ސޯމާލިއާ ސަރުކާރުން ތުހުމަތު ކުރެއެވެ.