ޗެއްނާއީގެ ހޮސްޕިޓަލަކުން އުރަމަތި އިއާދަކުރުމުގެ އޮޕަރޭޝަން ކޮށްދިނުން ހިލޭ

އިންޑިއާގެ ސްޓޭޓެއް ކަމަށްވާ ޓެމިލްނާޑޫގެ ހޮސްޕިޓަލެއްގައި އުރަމަތި އިއާދަކުރުމުގެ އޮޕަރޭޝަން ހިލޭ ކޮށްދިނުމަށް ކްލިނިކެއް ހުޅުވައިފި ކަމަށް އޮފިޝަލުން ބުނެފިއެވެ.

ކެންސަރު ބަލިން ސަލާމަތްވާ ފަރާތްތަކަށް އުރަމަތި އިއާދަކޮށްދިނުމުގެ މަސައްކަތް ހިލޭ ކޮށްދޭ ސްޓޭންލީ ހޮސްޕިޓަލުން މިހާރުވަނީ އުރަމަތި ބަދަލު ކޮށްދިނުމުގެ އޮޕަރޭޝަން ވެސް ހިލޭ ކޮށްދިނުމަށް ނިންމާފައެވެ.

މި ޕްރޮސީޖާ ހިލޭ ކޮށްދެނީ މަދު އާމްދަނީ އެއްލިބޭ ނިކަމެތި ފަރާތްތަކަށެވެ.

ޓެމިލްނާޑޫއަކީ އިންޑިއާގައި ސިއްހީ ނިޒާމް އެންމެ ރަނގަޅު އެއް ސްޓޭޓެވެ.

އުރަމަތި އިއާދަކުރުމުގެ އޮޕަރޭޝަނަށް އަމިއްލަ ހޮސްޕިޓަލްތަކުން 80،000 ރުޕީސް (1،233 އެމެރިކާ ޑޮލަރު) ނަގައެވެ.

ޗެއްނާއީ(ކުރީގެ މެޑްރާސް)ގެ މި ހޮސްޕިޓަލުގެ ޕްލާސްޓިކް ސާޖަރީއާއި ބެހޭ އިސްވެރިޔާ ޑރ ވީ ރާމަ ދޭވީ ވިދާޅުވީ އެ ކްލިނިކުން ތިން ބާވަތެއްގެ ޕްރޮސީޖާ ހެދޭއިރު އޭގެ ތެރޭގައި އުރަމަތީގެ ކެންސަރަށް ފަހު އުރަމަތި ކުޑަކޮށް ހުންނަ ފަރާތްތަކަށް އުރަމަތި ބޮޑުކޮށްދިނުމާއި އުރަމަތި ބޮޑުކޮށް ހުންނަ ފަރާތްތަކަށް އުރަމަތި ކުޑަކޮށްދިނުމުގެ އޮޕަރޭޝަން ހިމެނެއެވެ.