ސީރިޔާގެ ކުރުދީންނާއި ދެކޮޅަށް ތުރުކީއިން ހިންގާ އޮޕަރޭޝަން ފުޅާކުރާކަމަށް އޮރްދޮޣާން ވިދާޅުވެއްޖެ
ތުރުކީއިން ދެކޭގޮތުގައި ކުރުދީންނަކީ އެ ގައުމުގެ ސަލާމަތަށްހުރި ބިރެއް
ތުރުކީގެ އަސްކަރިއްޔާއިން މި އޮޕަރޭޝަން ފަށާފައިވަނީ ހޮނިހިރު ދުވަހު
ތުރުކީގެ ފައުޖުތަކުން ސީރިޔާގެ އުތުރުގައި ކުރުދީންގެ އަމާޒުތަކަށް ބޮމާއި ބަޑީގެ ހަމަލާތައް ދެމުންދާތާ 5 ދުވަސްވީއިރު އެ އޮޕަރޭޝަން ފުޅާކޮށް އިރުމަތީގެ ސިޓީއެއްކަމަށްވާ މަންބިޖްއާއި ހަމައަށް ފުޅާކުރައްވާނެ ކަމަށް ތުރުކީގެ ރައީސް ރަޖަބް ތައްޔިބު އޮރުދޮޣާން އިންޒާރުދެއްވައިފިއެވެ.
ތުރުކީއިން މިދިޔަ ހޮނިހިރު ދުވަހު ވަނީ އެމެރިކާގެ މަދަދާއިއެކު ހަނގުރާމަކުރަމުންދާ ކުރުދީ ހަނގުރާމަވެރިންނާ ދެކޮޅަށް އަފްރިންގައި އޮޕަރޭޝަނެއް ފަށާފައެވެ.
ތުރުކީއިން ދެކޭގޮތުގައި ކުރުދީންނަކީ އެ ގައުމުގެ ސަލާމަތަށްހުރި ބިރެކެވެ.
ހަލަބުގެ އިރުން އޮންނަ މަންބިޖް އަކީވެސް އެމެރިކާއިން މަދަދުވެރިވާ ކުރުދީންގެ ކޮންޓްރޯލްގެ ދަށުގައިވާ ސަރަހައްދެކެވެ.
އޮރުދޮޣާން ވިދާޅުވީ މި އުދަނގުލުން ސަރަހައްދު ސަލާމަތްކޮށްދޭން ތުރުކީއަށް ޖެހޭކަމަށެވެ.
ތުރުކީގެ އަސްކަރިއްޔާއިން ބުދަދުވަހު ބުނީ ކުރުދީންގެ އަދި އައިއެސްގެ 260 ހަނގުރާމަވެރިން މަރާލެވިފައިވާކަމަށެވެ. ކުރުދީންގެ ކޮމާންޑަރަކު ބުނެފައިވަނީ އެ އަދަދަކީ ބޮޑުކޮށްލައިގެން ބުނެފައިވާ އަދަދެއްކަމަށެވެ.
ތުރުކީގެ މީޑިއާތަކުން ބުނާ ގޮތުގައި އެ ގައުމުގެ ފައުޖުތަކުންވަނީ ކުރުދީންގެ ގިނަ ސަރަހައްދުތަކެއްގެ ކޮންޓްރޯލް ހޯދައި އެތަންތަނަކީ ރައްކާތެރި ސަރަހައްދުތަކަކަށް ހަދާފައެވެ.
